Erlent

Fundu fjölda ganga undir ævafornu hofi í Andesfjöllum

Kjartan Kjartansson skrifar
Chavín de Huantar-hofið í hlíðum Andesfjalla í Perú.
Chavín de Huantar-hofið í hlíðum Andesfjalla í Perú. Vísir/Getty

Hópur fornleifafræðinga fann net ganga undir Chavín de Huantar-hofinu í Andesfjöllunum í Perú. Hofið sjálft er talið meira en þrjú þúsund ára gamalt en gangarnir enn eldri.

Gangarnir fundust fyrr í þessum mánuði. John Rick, fornleifafræðingur frá Stanford-háskóla í Bandaríkjunum, segir Reuters-fréttastofunni að margt bendi til þess að gangarnir hafi verið  byggðir á undan hofinu sjálfu.

Chavín de Huantar er í um 3.200 metra hæð yfir sjávarmáli. Hofið var áður trúar- og stjórnunarmiðstöð. Þar hafa fundist að minnsta kosti 35 niðurgrafnir gangar sem tengjast allir í fornleifauppgreftri undanfarin ár. Talið er að gangarnir hafi verið byggðir á milli 1200 og 2000 fyrir krist.

Hofið var sett á heimsminjaskrá Sameinuðu þjóðanna árið 1985. Gangarnir voru innblásturinn að aðgerð perúska hersins sem gróf net ganga til þess að bjarga 72 manns sem voru haldnir föngnum af skæruliðahreyfingunni Tupac Amaru í sendiherrabústað Japans í Lima árið 1997.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×