Íslenski boltinn

Blika­konur verða í neðri hluta Bestu deildarinnar ef þær tapa fyrir Val í kvöld

Óskar Ófeigur Jónsson skrifar
Hildur Antonsdóttir og félagar í Breiðabliksliðinu þurfa sigur í kvöld ætli þær að vera með í titilbaráttunni í sumar.
Hildur Antonsdóttir og félagar í Breiðabliksliðinu þurfa sigur í kvöld ætli þær að vera með í titilbaráttunni í sumar. Vísir/Vilhelm

Eftir kvöldið í kvöld þá verður búið að spila einn þriðjung af Íslandsmóti kvenna í fótbolta en sjöttu umferð Bestu deilda kvenna lýkur þá með stórleik Breiðabliks og Vals á Kópavogsvellinum.

Valskonur komast aftur í toppsætið með sigri en heimakonur duttu alla leið niður í sjötta sætið eftir úrslitin í gærkvöldi.

Þróttarar unnu í Keflavík og komust á toppinn, Stjarnan vann Selfoss og komst upp fyrir Breiðablik og Eyjakonur fóru líka upp fyrir Breiðablik eftir ótrúlegan 5-4 endurkomusigur á Þór/KA út í Eyjum.

Tapi Blikar því leiknum í kvöld verða þær í neðri hluta deildarinnar þegar einum þriðja af mótinu er lokið.

Leikur Breiðabliks og Vals hefst klukkan 19.15 og verður sýndur beint á Stöð 2 Sport. Upphitun hefst klukkan 18.45 og eftir leikinn verða síðan Bestu mörkin á dagskrá þar sem verður farið yfir alla leiki sjöttu umferðarinnar.

Oftar en ekki hafa innbyrðis leikir Vals og Breiðabliks verið úrslitaleikir í baráttunni um Íslandsmeistaratitilinn en nú þurfa Blikakonur hreinlega að vinna til að halda sig með í baráttunni.

Vinni Valsliðið í kvöld þá eru þær komnar sex stigum á undan Blikum og Blikar væru um leik búnir að tapa jafnmörgum leikjum og þeir hafa unnið.

Þetta kemur í kjölfar þess að Blikakonur hafa tapað bæði fyrir Keflavík og fyrir ÍBV í síðustu fjórum leikjum sínum.

Fari allt á versta veg fyrir Blikakonur í kvöld þá yrði það i fyrsta skipti í sögu tíu liða deildar þar sem þær væri í neðri hluta deildarinnar þegar svo langt er liðið á mótið.

  • Sæti Breiðabliksliðsins eftir sex umferðir í sögu 10 liða deildar:
  • 2021 - 3. sæti (12 stig)
  • 2020 - 1. sæti (18 stig)
  • 2019 - 2. sæti (18 stig)
  • 2018 - 1. sæti (18 stig)
  • 2017 - 3. sæti (15 stig)
  • 2016 - 2. sæti (14 stig)
  • 2015 - 1. sæti (16 stig)
  • 2014 - 4. sæti (10 stig)
  • 2013 - 2. sæti (15 stig)
  • 2012 - 4. sæti (11 stig)
  • 2011 - 5. sæti (7 stig)
  • 2010 - 2. sæti (11 stig)
  • 2009 - 4. sæti (13 stig)
  • 2008 - 4. sæti (7 stig)
  • Samantekt:

  • 3 sinnum í efsta sætinu
  • 7 sinnum í efstu tveimur sætunum
  • 9 sinnum á topp þrjú
  • 14 sinnum í efri hluta
  • 0 sinnum í neðri hluta

Besta deildin er á Stöð 2 Sport. Smelltu hér til að horfa á leiki og þætti. Besta deildin er hluti af Stöð 2 Sport Ísland sem kostar 3.990 kr. á mánuði og má kaupa hér.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.