Innlent

Vona að lífeyrissjóðirnir komi inn í félagið með fjármagn

Fanndís Birna Logadóttir skrifar
Ragnar Þór Ingólfsson, formaður VR. 
Ragnar Þór Ingólfsson, formaður VR.  Stöð 2

Verkalýðshreyfingin varar við ófremdarástandi á leigumarkaði og hefur komið á fót nýju leigufélagi til að bregðast við stöðunni. Vonir eru bundnar við að lífeyrissjóðirnir taki þátt og að áhersla verði lögð á langtímasjónarmið, líkt og á Norðurlöndunum.

Húsnæðisfélagið Blær var formlega sett á fót í dag en félagið mun framleiða og byggja húsnæði á hagkvæmu verði í auknum mæli og fyrir stærri hóp en hefur hingað til verið gert. Félagið er systurfélag Bjargs en það er þó rekið á meiri félagslegum grunni.

Ragnar Þór Ingólfsson, formaður VR, segir að hugmyndin sé að koma með félag sem er á milli markaðarins og félagslega kerfisins.

„Við erum að smíða þetta utan um vonandi að lífeyrissjóðirnir komi að með fjármagn og fjárfesti, og sömuleiðis líka að sveitarfélögin geti þá komið inn með lóðir sem eru þá notaðar í jákvæðum tilgangi, það er að segja að byggja undir húsnæðis- og framfærsluöryggi fólks,“ segir Ragnar.

Skiptir máli hverjir eru að baki

Undirbúningurinn hefur verið í gangi undanfarin ár en um er að ræða samstillt átak Alþýðusambandsins, BSRB og VR. 

Í hinu nýja félagi verða engin tekju eða eignarmörk heldur er það byggt á kerfi sem hefur virkað á Norðurlöndunum, þar sem langtímasjónarmið eru í forgrunni og hóflegar arðsemiskröfur gerðar.

Það skipti máli hverjir eru að baki félagsins og hverjir eru með fjármagnið. 

„Það hefur alveg sýnt sig að fjárfestar sem fara fram með sambærilegum hætti og þeir gera á mörkuðum eru ekki hæfir til að eiga félög sem að leigja út húsnæði,“ segir Ragnar.

Skortur á langtímasjónarmiðum hingað til

Verkalýðshreyfingin hefur undanfarið varað við ófremdarástandi á leigumarkaði og gerði starfshópur á vegum þjóðhagsráðs tillögur að umbótum í síðustu viku. 

Drífa Snædal, formaður ASÍ, segir að með félaginu, sem og Bjargi sem er systurfélag Blævar, sé verkalýðshreyfingin að leggja sín lóð á vogarskálarnar.

Drífa Snædal, forseti ASÍ.Stöð 2

„Þetta er hugsað til langs tíma, þetta er ekki hugsað sem ágóði fyrir fjármagnseigendur heldur fyrst og fremst út frá húsnæðisöryggi landsmanna og það bara er hugsun sem hefur vantað,“ segir Drífa. 

„Það sem vantar sárlega eru leigufélög sem að ætla sér að vera til langs tíma, sem ætla sér ekki að koma inn á markaðinn, soga út fjármagn af honum og fara annað.“

Í grunninn er ljóst að það þurfi að auka framboð en sömuleiðis þarf að tryggja öryggi leigjenda.

„Þetta er bara eitt stærsta lífskjaramálið, það eru húsnæðismálin. Það er að búa í öruggu húsnæði, það er að vera með húsnæði á viðráðanlegum kjörum, og þetta er eitt skref í því,“ segir Drífa.


Tengdar fréttir

Ríkið þurfi að koma böndum á leigu­verð

Hagfræðingur sem sat í starfshópi sem skilaði á dögunum um aðgerðir og umbætur á húsnæðismarkaði til stjórnvalda segir að breyta þurfi húsnæðisstuðningi svo hann nái fyrst og fremst til tekjulágra og byggja þurfi upp í almenna íbúðakerfinu. Þar að auki þurfi að koma böndum á leigumarkaðinn svo tryggja megi húsnæðisöryggi leigjenda.

„Þetta lítur bara alveg skelfi­lega út“

Skelfileg staða blasir við á leigumarkaði að sögn formanns VR. Ísland er aftarlega á merinni þegar kemur að heilbrigðum húsnæðismarkaði og í málaflokknum er þörf á efndum, en ekki nefndum.

Líst ekki á leiguþak og óttast að of ströng skilyrði geti skaðað framboð

Fjármála- og efnahagsráðherra líst ekki á hugmyndir um leiguþak hér á landi líkt og aðrir ráðherrar hafa talað fyrir. Hann óttast að of ströng skilyrði geti orðið til þess að skaða framboð á leigumarkaði. Nauðsynlegt sé þó að bæta stöðu leigjenda og gera umbætur á húsnæðismarkaði, þar sem ofboðslegur vandi blasir við.

Byggja þarf um 35 þúsund í­búðir á næstu tíu árum

Starfshópur stjórnvalda um húsnæðismál kynnti í dag skýrslu um úrbætur á húsnæðismarkaði til að auka framboð og stuðla að stöðugleika, bæði til skamms og langs tíma. Hjá starfshópnum er mikil samstaða um mikilvægi þess að tryggja aukið framboð íbúða til að stuðla að stöðugleika á húsnæðismarkaði.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×