Fótbolti

Hörður Björg­vin yfir­gefur CSKA Moskvu í sumar

Runólfur Trausti Þórhallsson skrifar
Hörður Björgvin í einum af 38 leikjum sínum fyrir íslenska landsliðið.
Hörður Björgvin í einum af 38 leikjum sínum fyrir íslenska landsliðið. VÍSIR/VILHELM

Landsliðsmaðurinn Hörður Björgvin Magnússon mun yfirgefa CSKA Moskvu í sumar. Þetta kemur fram á samfélagsmiðlum rússneska félagsins.

Hinn 29 ára gamli varnarmaður hefur verið á mála hjá CSKA síðan 2018. Hörður Björgvin sleit hásin vorið 2021 en hefur náð fullum bata og er farinn að spila á nýjan leik. Það breytir því ekki að samningur hans í Moskvu rennur út í sumar og ljóst að varnarmaðurinn knái mun róa á önnur mið.

„Hörður Magnússon yfirgefur CSKA. Samningur íslenska varnarmannsins rennur út þegar tímabilinu lýkur. Við viljum þakka honum fyrir þann tíma sem hann hefur leikið í rauð-bláu treyjunni og óskum honum velfarnaðar í því sem hann tekur sér fyrir hendur,“ segir á samfélagsmiðlum CSKA.

Hörður Björgvin er uppalinn hjá Fram hér á landi, þaðan lá leiðin til ítalska stórliðsins Juventus. Hann var lánaður til Spezia og Cesena þar í landi áður en hann samdi við Bristol City á Englandi árið 2016 og svo CSKA tveimur árum síðar.

Alls á Hörður Björgvin að baki 38 A-landsleiki fyrir Íslands hönd. Í þeim hefur hann skorað tvö mörk, annað var í gríðarlega mikilvægum 1-0 sigri á Króatíu á Laugardalsvelli sumarið 2017.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.