Íslenski boltinn

„Gefur þeim svakalega mikið“ að hafa kveðið Kópavogsgrýlu í kútinn

Sindri Sverrisson skrifar
Eyjakonur hafa unnið KR og Breiðablik og eru með sjö stig eftir fyrstu fimm leiki sína.
Eyjakonur hafa unnið KR og Breiðablik og eru með sjö stig eftir fyrstu fimm leiki sína. vísir/vilhelm

Margrét Lára Viðarsdóttir segir sitt gamla lið ÍBV hafa sýnt mikið meiri stöðugleika í upphafi leiktíðar heldur en síðustu ár. Eyjakonur unnu frækinn 1-0 sigur gegn Breiðabliki í Kópavogi í gær eftir að hafa skíttapað þar 7-2, 8-0 og 9-2 síðustu þrjú ár.

Bikarmeistarar Breiðabliks ætla sér að berjast um Íslandsmeistaratitilinn og þurfa nú enn frekar á sigri að halda í stórleiknum gegn Val á þriðjudag eftir að hafa þegar tapað gegn Keflavík og ÍBV.

„Það má ekkert mikið meira út af bregða þó það sé skrýtið að segja það í 5. eða 6. umferð,“ sagði Margrét Lára í Bestu mörkunum á Stöð 2 Sport áður en hún byrjaði að hrósa liði ÍBV:

„Það verður ekkert tekið af Eyjaliðinu. Stórkostleg barátta, mjög þéttar, og ég er mjög glöð að sjá þetta Eyjalið í upphafi móts. Þær eru stöðugri en oft áður. Við höfum oft séð þær tapa stórt í upphafi móts, svo ná þær einhverjum ofurkröftum og vinna óvæntan sigur. Það er mikið meiri stöðugleiki yfir þessu. Þær eru inni í öllum leikjum,“ sagði Margrét Lára.

Klippa: Bestu mörkin - Sigur ÍBV á Breiðabliki

Þær Lilja Dögg Valþórsdóttir hrósuðu Jonathan Glenn, þjálfara ÍBV, sem byrjar vel á sinni fyrstu leiktíð með Eyjakonur.

„Þetta gefur þeim svakalega mikið, að fara heim af Kópavogsvelli með þrjú stig, því þeim hefur nú ekki gengið vel þar undanfarin ár. Ég veit að það hefur verið ákveðin „Grýla“ fyrir Eyjaliðið að fara á Kópavogsvöll en þetta gefur liðinu mikið, og Jonathan Glenn mikið sjálfstraust. Hann er að gera virkilega góða hluti með þetta lið,“ sagði Margrét og Lilja bætti við:

„Hann er búinn að sjá það hvar Breiðablik skorar sín mörk og hvernig, og þær [Blikakonur] náðu ekki að komast upp í þessar „rennur“ eins og þær hafa verið að gera og fá sínar fyrirgjafir. Hann var búinn að loka fyrir þetta og þær fóru algjörlega eftir því.“


Besta deild kvenna er á Stöð 2 Sport en upplýsingar um útsendingar má finna hér. Besta deildin er hluti af Stöð 2 Sport Ísland sem kostar 3.990 krónur á mánuði.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.