Innlent

Súla drapst við Kasthústjörn

Jakob Bjarnar skrifar
Súlan mætti á Álftanesið á föstudaginn, settist við Kasthústjörn þar sem er fjölskrúðugt fuglalíf og var þá greinilega fárveik.
Súlan mætti á Álftanesið á föstudaginn, settist við Kasthústjörn þar sem er fjölskrúðugt fuglalíf og var þá greinilega fárveik. gunnsteinn ólafsson

Íbúi á Álftanesi telur ekki ólíklegt að súlan hafi verið smituð af hinni skæðu fuglaflensu sem nú geisar og vonar að smit berist ekki í hundruð fugla sem þarna koma.

Gunnsteinn Ólafsson tónskáld með meiru birti mynd á Facebook-síðu sinni af súlu sem settist við Kasthústjörn á Álftanesi, hvar mikið og fjölskrúðugt fuglalíf er, á föstudag og var greinilega fárveik.

„Hún húkti í grasinu og beið örlaga sinna. Í morgun var hún dauð,“ segir Gunnsteinn.

Í morgun var súlan steindauð. Gunnsteinn óttast að hún hafi verið smituð af hinni skæðu fuglaflensu.Gunnsteinn Ólafsson

Alvarleg fuglaflensa geisar á Íslandi

Eins og fram hefur komið geisar alvarleg og bannvæn fuglaflensa á Íslandi. Í síðasta mánuði sýndu vefmyndavélar í Eldey dauðar súlur á víð og dreif og fer þeim fjölgandi. Óttuðust menn að komin væri fuglaflensa í stofninn og sagði Gunnar Þór Hallgrímsson, prófessor í dýrafræði við HÍ, að vont væri ef fuglaflensusmit bærist í fuglahópa svo sem sjófuglum sem verpa þétt og er því þar um að ræða kjöraðstæður fyrir veiruna að dreifast.

Um miðjan mánuð var svo flensan staðfest í þremur villtum fuglum sem fundist hafa hér á landi; heiðargæs við Hornafjörð, hrafn á Skeiðum í Árnessýslu og súlu rétt við Strandarkirkju. Síðan hafa fleiri smit greinst og viðbúnaðarstig hjá MAST vegna flensunnar.

MAST áhugalaust um dauða súlunnar

Gunnsteinn er þó ekki allskostar ánægður með einmitt viðbrögðin hjá MAST.

„Þetta er annað tilfellið á tveimur árum þar sem súla ber beinin við tjörnina. Í báðum tilfellum var haft samband við MAST en engin viðbrögð sýnileg. 

Gunnsteinn Ólafsson furðar sig á því að MAST sinni ekki tilkynningu um dauða súlu á Álftanesi.úr einkasafni

Vonandi berst ekki sýking í aðra fugla sem dvelja hundruðum saman við tjörnina, þar á meðal fjöldi margæsa á leið norður yfir Grænlandsjökul.“

Gunnsteinn sendi þrjár tilkynningar um hina veikluðu súlu sem þá drapst til MAST. Hann segist aðspurður vitaskuld ekki geta fullyrt um það hvort það var elli eða flensa sem dró súluna til dauða.

„Hef ekki hugmynd um hvað var að henni en fyrst hún bar sig svona aumlega, fór ekki þótt að henni væri gengið var greinilegt að ekki væri allt með felldu. Taldi rétt að láta vita af þessu og gerði ráð fyrir að MAST myndi bruna á staðinn,“ segir Guðsteinn sem enn býður viðbragða.


Tengdar fréttir

Fuglar um allt land detta dauðir niður

Fuglaflensa hefur nú greinst í að minnsta kosti tólf villtum fuglum víða um landið og ljóst er að þessi skæði sjúkdómur er nú orðinn útbreiddur og smithætta fyrir alifugla er  mikil. Viðbúnaðarstig verður hækkað í rautt þegar sjúkdómurinn greinist í alifuglum og þurfa bændur að gæta sín vel. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.