Willum Þór allt í öllu í sigri BATE

Gestirnir komust óvænt yfir á 26. mínútu leiksins en aðeins tveimur mínútum síðar fengu heimamenn vítaspyrnu. Willum Þór fór á punktinn og jafnaði af öryggi, staðan 1-1 í hálfleik.

Þegar tæpar tíu mínútur voru liðnar af síðari hálfleik kom markið sem tryggði BATE á endanum sigur. Það skoraði Danila Nechaev eftir sendingu Willums Þórs. Íslenski miðjumaðurinn spilaði allan leikinn og sá til þess að sínir menn kláruðu leikinn með 2-1 sigri.

BATE er sem fyrr á toppi deildarinnar, nú með 19 stig eftir sjö leiki.