Innlent

Vill ekki kannast við myndina sem hann birti af Vítalíu

Hallgerður Kolbrún E. Jónsdóttir skrifar
Sigurður G. Guðjónsson birti mynd af Vítalíu í story hjá sér á Facebook.
Sigurður G. Guðjónsson birti mynd af Vítalíu í story hjá sér á Facebook. Vísir/samsett

Hæstaréttarlögmaðurinn Sigurður G. Guðjónsson segist ekki hafa tekið mynd af Vítalíu Lazarevu og birt í „story“ hjá sér á Facebook. Myndina var þó að finna á Facebook-síðu hans í morgun. Vítalía hefur sakað nafntogaða og þjóðþekkta menn um kynferðisofbeldi.

Skjáskot af myndinni hefur farið eins og eldur í sinu um Twitter eftir að Vítalía birti það eftir miðnætti í gær. Vítalía skrifar við myndina: 

„Það er ekkert spes að lögfræðingur sem ég þekki ekki baun í bala taki mynd af mér þegar ég er að labba inn á fund að hitta minn lögmann... Það sem er ennþá meira spes er að hann póstar myndinni á Facebookið sitt. HJÁLP.“

Rúmlega sex hundruð manns hafa líkað við tíst Vítalíu og hátt í fimmtíu endurtíst því. Þingmaðurinn Gísli Ólafsson er einn þeirra sem deilt hefur tístinu og segir það þekkta taktík hjá lögmönnum að reyna að hræða kærendur skjólstæðinga sinna. 

Sigurður G. hefur verið mikið á milli tannanna á fólki í vetur í tengslum við mál ungra kvenna sem sakað hafa menn um ofbeldi opinberlega, eftir að hann birti Facebook-færslu um mál Þórhildar Gyðu Arnarsdóttur, sem sakaði Kolbein Sigþórsson knattspyrnumann um ofbeldi. Sigurður birti í færslunni umdeildar ljósmyndir úr skýrslu lögreglu af Þórhildi. 

Fréttastofa náði tali af Sigurði í sambandi við mynddeilingu hans af Vítalíu á Facebook. Þegar blaðamaður náði af honum tali sagðist hann ekkert kannast við það að hafa deilt myndinni á Facebook. 

„Ég kannast ekki við þetta. Ég þarf bara að skoða hvort einhver er að gramsa í símanum mínum og taka út gögn og skeyta saman við eitthvað annað. Ég bara hef ekki mér vitanlega birt neitt svona í story nema af manni sem ég hitti í hjólaferð. Ég er jafn undrandi og allir aðrir,“ segir Sigurður G. 

Að neðan má sjá upptöku af Facebook-síðu Sigurðar sem fréttamaður tók í morgun.

„Mér finnst svo ótrúlegt að ef ég hef birt mynd af þessari konu að enginn hefði þá hringt í mig og spurt hvers vegna ég væri að birta mynd af henni. Heldur fólk að ég sé svo vitlaus að maður birti einhverjar myndir af einhverju fólki út í bláinn?“

Á skjáskotinu má sjá að myndin er dagsett 8. desember, sem þýðir að hún hafi verið sett í story þann dag, um mánuði áður en Vítalía steig fram í ítarlegu viðtali þar sem hún sakaði nokkra menn um ofbeldi. Venjulega myndu myndir sem þessar, sem settar eru í story sama hvort það er á Instagram eða Facebook, hverfa eftir sólarhring. 

Nema hvað, Sigurður virðist hafa sett myndina í „Feature“ flokkinn, sem geymir myndir og hefur þær opnar lengur, jafnvel ótímabundið þar til þær eru teknar út handvirkt. 

Fréttastofa náði aftur tali af Sigurði eftir að myndin fannst í „Feature“. Hann segist ekkert kannast við þessa myndbirtingu. 

„Ég ætla bara að láta skoða hvað er í gangi á Facebook-síðunni minni. Ég vona að allar mínar myndir séu private á Facebook. Ég er algjörlega slakur.“

Fréttastofa hefur leitað viðbragða Vítalíu vegna málsins og reynt að ná af henni tali undanfarnar vikur en án árangurs.


Tengdar fréttir

„Ljóst að almenningi er misboðið í þessu máli“

Fyrirtæki vilja væntanlega ekki tengja sig við einstaklinga sem hafa viðhaft einhverja háttsemi sem almenningi finnst óásættanleg. Þetta kom fram í máli Gunnars Inga Jóhannssonar hæstaréttarlögmanns í Pallborðinu á Vísi í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.