Sport

Spilaði sárþjáð þrátt fyrir varnaðarorð þjálfara sinna

Ingvi Þór Sæmundsson skrifar
Gert að sárum Emmu Raducanus.
Gert að sárum Emmu Raducanus. getty/Darrian Traynor

Emma Raducanu féll úr leik í 2. umferð Opna ástralska meistaramótsins eftir tap fyrir Dönku Kovinic. Nokkrir í þjálfara- og starfsliði Raducanus vildu að hún drægi sig úr leik vegna blaðra sem hún var með á höndunum.

Raducanu skaust fram á sjónarsviðið þegar hún vann Opna bandaríska meistaramótið í fyrra. Hún varð þar með sú fyrsta til að vinna risamót eftir að hafa þurft að fara í gegnum undankeppni. Raducanu tapaði ekki setti á Opna bandaríska.

Hin nítján ára Raducanu vann Sloane Stephens í 1. umferð Opna ástralska en tapaði fyrir Kovinic í 2. umferðinni í gær. Öllum mátti ljóst vera að Raducanu gekk ekki heil til skógar. Hún harkaði samt af sér, þrátt fyrir varnaðarorð frá þjálfurum sínum.

Raducanu var með blöðrur á hægri höndinni, þeirri sem hún slær með, í nokkra daga. Hún reyndi allt til að fá bót meina sinna en ekkert virkaði.

„Þetta hefur verið áskorun, ekki spurning. Þetta hafði mikil áhrif á æfingarnar síðustu daga,“ sagði Raducanu við BBC eftir tapið fyrir Kovinic.

„Sumir í liðinu mínu vildu ekki að ég spilaði en ég vildi láta reyna á það, berjast og sjá hversu langt það myndi skila mér.“

Raducanu segir að hún hafi sannað fyrir sjálfri sér að hún sé harðari af sér en hún hélt. „Ég lærði líka að ég er með hæfileika í höndunum (e. hand skills) þrátt fyrir að sumir segi að ég sé með múrarahendur. Ef ég get notað þá og blandað þeim við minn ágenga leik get ég orðið mjög hættuleg.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.