Fótbolti

„Gríðarlega spenntur að vinna með Túfa“

Ingvi Þór Sæmundsson skrifar
Alex Þór Hauksson lék fjölda leikja með U-21 árs landsliðinu, meðal annars á EM 2021.
Alex Þór Hauksson lék fjölda leikja með U-21 árs landsliðinu, meðal annars á EM 2021. vísir/vilhelm

Alex Þór Hauksson kveðst mjög spenntur fyrir því að spila undir stjórn nýs þjálfara Öster, Srdjan Tufegdzic, eða Túfa eins og hann er jafnan kallaður.

Alex er í íslenska landsliðshópnum sem mætir Úganda á morgun og Suður-Kóreu á laugardaginn. Leikirnir fara báðir fram í Antalya í Tyrklandi.

Eftir að hafa verið í stóru hlutverki hjá Stjörnunni í nokkur ár samdi Alex við Öster fyrir síðasta tímabil. Hann lék þrettán leiki í sænsku B-deildinni í fyrra. Hann segir að viðbrigðin að fara í aðra deild hafi verið nokkur.

„Þetta var mikill lærdómur. Þetta var svolítið svart og hvítt fyrir mig. Ég spilaði lítið í byrjun en spilaði svo nánast alla leiki eftir hlé. Það gekk mjög vel. Það var mikill munur. Ég var búinn að vera í fjögur ár með Stjörnunni og ég var í þægindaramma þar,“ sagði Alex á blaðamannafundi landsliðsins í gær.

„Þetta var mikið stökk, ekki bara fótboltinn. Að búa í öðru landi, vera með annað tungumál og það var klár breyting. Þegar það kom fór þetta að ganga betur og betur. Undir restina var maður kominn á gott ról.“

Í síðasta mánuði var Túfa ráðinn þjálfari Öster. Tímabilin 2020 og 2021 var hann aðstoðarþjálfari Vals. Áður hafði hann þjálfað KA og Grindavík. Alex hlakkar til samstarfsins með Túfa.

„Ég er gríðarlega spenntur að vinna með Túfa. Ég hef heyrt góða hluti um hann. Við erum með sömu hugmyndafræði. Við erum jafn metnaðarfullir að ná í árangur og það verður gott að fá annan „Íslending“ með svipað hugarfar,“ sagði Alex sem hefur leikið þrjá landsleiki.

Leikur Íslands og Úganda hefst klukkan 14:00 á morgun og verður sýndur beint á Stöð 2 Sport.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.