Innlent

Segir nýtt íbúðahverfi skerða rekstraröryggi flugvallarins

Kristján Már Unnarsson skrifar
Sigrún Björk Jakobsdóttir er framkvæmdastjóri Isavia innanlands, dótturfélags sem annast rekstur innanlandsflugvallanna.
Sigrún Björk Jakobsdóttir er framkvæmdastjóri Isavia innanlands, dótturfélags sem annast rekstur innanlandsflugvallanna. Arnar Halldórsson

Óvíst er hvort Isavia muni afhenda Reykjavíkurborg svæði í Skerjafirði í vor til byggingar nýs íbúðahverfis án frekari rannsókna. Framkvæmdastjóri innanlandsflugvalla Isavia segir húsbyggingar þar hafa umtalsverð áhrif á rekstraröryggi Reykjavíkurflugvallar.

Í fréttum Stöðvar 2 kom fram að Reykjavíkurborg er búin að skipuleggja hverfi áttahundruð íbúða á svæðinu. En fyrst þarf að færa flugvallargirðinguna til að borgin fái landið afhent. Samningur samgönguráðherra og borgarstjóra í nóvember 2019 gæti hins vegar hafa fært Isavia neitunarvald gagnvart því að girðingin verði færð.

Svona sér borgin fyrir sér nýja íbúðabyggð í Skerjafirði skammt frá flugbrautunum.Reykjavíkurborg

Í samkomulagi ríkis og borgar fyrir tveimur árum fólst í raun ákveðið vopnahlé. Rekstraröryggi Reykjavíkurflugvallar skyldi tryggt meðan verið væri að kanna nýtt flugvallarstæði í Hvassahrauni. Stóra spurningin er hvort færsla flugvallargirðingarinnar muni skerða rekstraröryggi flugvallarins.

„Við höfum áhyggjur af þessu. Öll þétting byggðar í kringum flugvelli hefur áhrif á aðstæður á braut, á vindafar á braut,“ segir Sigrún Björk Jakobsdóttir, framkvæmdastjóri Isavia innanlands, dótturfélags sem annast rekstur innanlandsflugvallanna.

Hún segir eitt það versta þegar flugvélar í vindi detti inn í lognpoll sem byggingarnar skapi þegar þær nálgist brautina. Ennfremur hafi Isavia áhyggjur af framkvæmdatímanum í hverfinu.

„Þetta er nálægt brautinni. Þarna verða reistir háir kranar. Byggingarnar hafa að vísu aðeins lækkað frá fyrstu hugmyndum. En þetta mun hafa umtalsverð áhrif á raun bara rekstrargrundvöll og afköst flugvallarins.“

Isavia segir Hlíðarendabyggð hafa merkjanleg áhrif á hreyfingar flugvéla.Vísir/Vilhelm

Sigrún vitnar til skýrslu sem Isavia lét hollensku geimferðastofnunina gera þar sem áhættan var talin þolanleg en samt yrði að taka tillit til hennar.

„Þetta getur skapað ókyrrð. Það er búið að setja þetta í líkön og herma þetta. Og það er sagt OK: Þetta gæti gerst einu sinni í mánuði eða eitthvað þessháttar. Við vitum það hins vegar ekki fyrr en í raun að byggingarnar eru komnar.

Við sjáum alveg áhrifin frá Hlíðarendabyggingunum. Þær hafa merkjanleg áhrif,“ segir Sigrún Björk.

Borgin vill hefja jarðvegsskipti í vor og gerð hljóðmanar, að sögn Sigrúnar.

„Það mun verða sett upp hljóðmön. Hún gæti líka haft áhrif á aðstæður á braut. Og við viljum láta skoða það dálítið rækilega áður en við gefum heimild til þess.

En áform borgarinnar eru að þessar framkvæmdir hefjist núna í vor, sumar.“

Dagur B. Eggertsson, þá staðgengill borgarstjóra, og Katrín Júlíusdóttir, þáverandi fjármálaráðherra, gerðu hinn umdeilda samning um kaup borgarinnar á flugvallarlandi ríkisins í Skerjafirði árið 2013.Reykjavíkurborg

Sigrún segir að ríkið hafi selt borginni landið á sínum tíma og Isavia sé því í þröngri stöðu að vinna úr tveggja ára gömlu samkomulagi ríkis og borgar. En telur hún koma til greina að Isavia segi einfaldlega nei?

„Ja.. ég veit bara ekki hvort við höfum heimild til þess að segja nei. Þegar samgönguráðherra og borg hafa gert með sér samkomulag þá set ég bara spurningamerki við hversu afdráttarlaus neitun Isavia getur verið, nema að undangengnum bara mjög ítarlegum rannsóknum á afleiðingum þess.“

-En eins og þú sérð þetta núna, þá skerðir þetta rekstraröryggi flugvallarins?

„Þetta mun gera það. Öll þétting byggðar í kringum flugvelli gerir það,“ svarar Sigrún Björk Jakobsdóttir, framkvæmdastjóri Isavia innanlands.

Hér má sjá frétt Stöðvar 2:


Tengdar fréttir

Borgin tekur tvær sneiðar til viðbótar af flugvellinum

Nýtt aðalskipulag Reykjavíkur gerir ráð fyrir að tvær sneiðar verði skornar af Reykjavíkurflugvelli á næstu þremur árum og að vellinum verði svo endanlega lokað eftir áratug, árið 2032.

„Samningurinn ekki pappírsins virði“

Borgarráðsfulltrúar Sjálfstæðisflokksins og áheyrnarfulltrúar Miðflokksins og Flokks Fólksins voru harðorðir í gagnrýni á nýju deiliskipulagi Reykjavíkurborgar um uppbyggingu nýs hverfis í Skerjafirði.

Vigdís varar við því að borgin vinni myrkraverk á flugvellinum í sumar

Borgarfulltrúar minnihlutans í Reykjavík kröfðust þess á borgarstjórnarfundi í dag að borgin hætti að þrengja að flugvellinum og að nýju Skerjafjarðarhverfi yrði frestað. Borgarstjóri segir þetta frábært byggingarland og óskynsamlegt sé að fresta uppbyggingu.

Svona sér Ómar sátt um flugvöll

Flugmaðurinn sem lent hefur oftar á Reykjavíkurflugvelli en flestir aðrir, Ómar Ragnarsson, segir fáránlegt að einn besti möguleikinn til málamiðlunar verði strax útilokaður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.