Líf Katrínar tók U-beygju árið 2014 þegar hún var aðeins 21 árs gömul og fékk sína fyrstu heilablæðingu. Tíu dögum síðar fékk hún blóðtappa en stærsta áfallið kom sumarið 2015. Þá fékk hún heilablæðingu og þurfti í kjölfarið að undirgangast heilaskurðaðgerð sem bjargaði lífi hennar.
Sjá: Framtíðarvon: „Ég vaknaði degi of seint en ég mundi allt“
Síðustu ár hefur hægt á tilveru fólks sökum heimsfaraldurs og segist Katrín því hafa fengið aukið tækifæri til þess að vera á svipuðu tempói og aðrir í kringum sig.
„Allt í einu er ég ekki sú eina sem er svona hikandi við að grípa þau tækifæri sem mér bjóðast. Ég finn líka að svo margir standa núna í þeim sporum, sem ég þekki svo vel, að þurfa að vega og meta hvort hlutirnir séu áhættunnar virði og að velja og hafna í samræmi við sífellt nýjar og óvæntar aðstæður.“
„Takk Covid fyrir að sýna mér þessa nýju tilveru.“
„Covid tók allar þessar þrár í burtu frá mér“
Katrín segir heimsfaraldurinn hafa gefið okkur tækifæri til þess að skoða hvað það er sem skiptir raunverulegu máli og hvað það er sem við viljum leggja rækt við.
„Enginn veit hvað átt hefur fyrr en misst hefur og kannski er stundum svolítið gott að fá að vita hvað maður á og hvað maður er heppin að eiga að.“
Katrín er búsett á Flateyri ásamt foreldrum sínum en áður en heimsfaraldur skall á var þrá Katrínar til þess að flytja til Reykjavíkur orðin mikil. Vinkonur hennar eru búsettar í Reykjavík og fannst henni hún vera að missa af mörgu.
„En Covid tók allar þessar þrár í burtu frá mér og sýndi mér aftur kostina við að búa á svona litlum stað þar sem það er í lagi að eiga sinn hóp í kringum sig og fá hann í heimsókn til sín.“
Hlakkar til að takast á við komandi verkefni
Síðustu tvö árin hefur Katrín náð miklum árangri. Hún hefur eignast hjól sem gerir henni kleift að hjóla frá sér allt eirðarleysi eins og hún orðar það. Hún getur hrafnasparkað nafn sitt á blað með hægri hendinni sem áður var hreppt og einskis nýt. Þá er hún einnig farin að mála með alkóhólbleki og hefur öðlast betri skynjunarfærni með vinstri hendi.
„Ég hlakka til að takast á við öll þau verkefni sem munu koma með líðandi tímum og ætla að halda áfram að leggja mig fram.“
Bloggfærslu Katrínar má lesa í heild sinni hér.
Katrín sagði sögu sína í Ísland í dag fyrr á árinu og má sjá innslagið hér að neðan.
