Hollenska landsliðskonan Jill Roord skoraði eina markið í 1-0 útisigri á Bayern München í leik þar sem toppsætið í Þýskalandi var undir. Glódís Perla Viggósdóttir sat á varamannabekk Bæjara en Karólína Lea Vilhjálmsdóttir var ekki í leikmannahópi liðsins að þessu sinni.
Sigurinn lyftir Wolfsburg á toppinn með 19 stig að loknum 8 umferðum. Þar á eftir koma Bayern með 18 stig líkt og Eintracht Frankfurt.
Vålerenga vann 3-1 útisigur á Klepp í lokaumferð norsku úrvalsdeildarinnar. Ingibjörg Sigurðardóttir stóð vaktina í hjarta varnarinnar. Amanda Andradóttir kom inn af bekknum þegar fimm mínútur voru til leiksloka.
Vålerenga endaði í 4. sæti deildarinnar með 35 stig. Nú fer af stað úrslitakeppni með efstu fjórum liðum deildarinnar en Vålerenga er sem stendur 15 stigum á eftir toppliði Sandviken.
