Íslenski boltinn

Fá milljónir í bætur vegna EM-fara

Sindri Sverrisson skrifar
Agla María Albertsdóttir er ein af Blikunum í íslenska landsliðinu og ef hún bíður lengur með að fara í atvinnumennsku mun Breiðablik fá bætur vegna þátttöku hennar á EM.
Agla María Albertsdóttir er ein af Blikunum í íslenska landsliðinu og ef hún bíður lengur með að fara í atvinnumennsku mun Breiðablik fá bætur vegna þátttöku hennar á EM. vísir/vilhelm

Knattspyrnufélög munu í fyrsta sinn fá bætur vegna þátttöku leikmanna á Evrópumóti kvenna í fótbolta vegna mótsins sem fram fer á Englandi næsta sumar. Ljóst er að þetta mun koma sér vel fyrir Breiðablik og Val, og hugsanlega fleiri íslensk félög.

Samkvæmt ákvörðun framkvæmdastjórnar UEFA fá félög að lágmarki 10.000 evrur, sem í dag jafngildir um 1,5 milljón króna, fyrir hvern fulltrúa sinn á EM.

Ekki skiptir máli hvort leikmaður spili á mótinu eða sé varamaður. Nóg er að hann sé í 23 manna landsliðshópi sem fer á EM.

Heildarupphæðin sem UEFA útdeilir til félaga er 4,5 milljónir evra eða um 675 milljónir króna. Félög fá greiddar 500 evrur fyrir hvern dag sem þeirra leikmaður er með sínu landsliði á EM, og fyrir hvern dag undirbúnings fyrir EM (að hámarki 10 dagar fara í undirbúning).

Í síðasta landsliðshópi Íslands átti Breiðablik fimm fulltrúa og Valur tvo. Færi sami hópur á EM myndi það því að lágmarki skila Breiðabliki 7,5 milljónum og Val 3 milljónum.

Sif Atladóttir er á leið heim í íslenskt félag en ekki liggur fyrir hvaða félag það verður. Nýja félagið fær bætur ef að Sif fer með á EM.vísir/vilhelm

Ef að Ísland kæmist svo upp úr sínum riðli, og framlengdi þannig dvöl sína á EM, myndi það skila hærri upphæð fyrir félögin (að lágmarki 1,5 milljón króna fyrir Breiðablik).

Íslensk félög fengju auðvitað einnig bætur vegna erlendra leikmanna sem færu á EM. Til að mynda ef að Chloe Van de Velde yrði enn á mála hjá Breiðabliki og kæmist í landsliðshóp Belga næsta sumar.

Aðeins evrópsk félög fá bætur vegna leikmanna á EM. Félögin munu fá greiðslurnar í október eða nóvember á næsta ári.

Ísland spilar í D-riðli á EM og mætir þar Belgíu 10. júlí, Ítalíu 14. júlí og Frakklandi 18. júlí.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.