Lokaleikur Hollendingsins var 1-0 tap á móti Rayo Vallecano en nokkrum dögum fyrr hafði Barcelona tapað á heimavelli á móti Real Madrid í El Clasico.

Barcelona hefur verið eitt eftirsóttasta félagið fyrir þjálfara undanfarin ár en ástandið innan klúbbsins núna er þó ekki mjög heillandi eftir óstjórn á síðustu árum og mikil fjárhagsvandræði í dag.

Það er þó einn maður sem hefur verið orðaður við starfið í langan tíma og það er Barcelona goðsögnin Xavi Hernandez. Nafn Xavi er enn á ný efst á blaði.

Skúbbarinn Fabrizio Romano segir að Xavi hafi áhuga á starfinu en að Barcelona sé bara rétt að byrja að kanna stöðu hans hjá Al Sadd í Katar.

Heimildir ESPN herma að Barcelona muni hefja viðræður við Xavi á morgun föstudag um að gerast næsti þjálfari liðsins.

Næstu þrír leikir eru á móti Alaves, Dynamo Kiev og Celta Vigo en einhver annar þjálfari mun stjórna liðinu tímabundið í þeim.

Koeman skilur við Barcelona í níunda sæti í spænsku deildinni og í þriðja sæti í sínum riðli í Meistaradeildinni með markatöluna 1-3 og aðeins einn sigur í þremur leikjum.

Xavi Hernandez er fyrrum fyrirliði Barcelona og spilaði 767 opinbera leiki fyrir félagið sem var met þar til að Lionel Messi sló það. Xavi varð átta sinnum spænskur meistari með félaginu og vann Meistaradeildina fjórum sinnum.

Xavi er 41 árs og hefur verið að þjálfa lið Al Sadd í Katar með ágætum árangri. Það er hans eina þjálfarreynsla og þar tók hann við liðinu eftir að hafa spilað með því áður. Xavi hefur gert Al Sadd einu sinni að katörskum meisturum og tvisvar að bikarmeisturum. Alls hefur hann unnið sjö titla sem þjálfari félagsins á tveimur árum.

Xavi er ekki bara einn besti leikmaðurinn í sögu Barcelona heldur einn besti miðjumaður sögunnar. Hann spilaði í sautján ár hjá Barcelona og kom upp í gegnum La Masia unglingastarf félagsins. Ef einhver getur grafið upp gömlu Barcelona ræturnar og fundið uppskriftina sem gekk svo vel í hans tíð þá er það örugglega hann.