Innlent

Sex hundruð starfsmenn á Landspítalanum eru óbólusettir

Hallgerður Kolbrún E. Jónsdóttir skrifar
Már Kristjánsson, forstöðumaður lyflækinga- og bráðaþjónustu á Landspítala, er svartsýnn á stöðu spítalans í bréfi sem birtist í dag. 
Már Kristjánsson, forstöðumaður lyflækinga- og bráðaþjónustu á Landspítala, er svartsýnn á stöðu spítalans í bréfi sem birtist í dag.  Vísir/Vilhelm

„Gripið hefur um sig óraunsæ bjartsýni í samfélaginu sem hefur smitast inn í stjórnmálin og lýsir sér með umræðum um miklar afléttingar og frelsi - nokkuð sem faraldurinn leyfir ekki endilega því ennþá eru að greinast 50-90 nýir sjúklingar á dag.“

Þetta segir í svartsýnu bréfi Más Kristjánssonar, forstöðumanns lyflækninga- og bráðaþjónustu á Landspítala, sem birtist á vef Landspítalans í dag. Már skrifar bréfið fyrir hönd farsóttaranefndar spítalans og segir ástandið á spítalanum mjög svart. Kemur fram að sex hundruð starfsmenn spítalans séu óbólusettir.

„Langvarandi álag og erfiðleikar í starfsemi Landspítala eru öllum kunnir og kom faraldur Covid-19 sem olía á þann eld.  Nú eru nær allar stéttir að upplifa langvarandi þreytu vegna faraldursins,“ skrifar Már í bréfinu. 

Fjöldinn á Covid-göngudeildinni slagi í um 800 og að meðaltali leggist einn sjúklingur inn á spítalann á dag vegna Covid-19. Þá greinist þrír til níu sjúklingar eða starfsmenn, að sögn Más, daglega óvænt með Covid-19 og ráðast þurfi í mikla rakninga- og sóttkvíarvinnu vegna þess. 

„Sem dæmi var 21 óvænt greining sjúklinga/starfsmanna eða útsetning frá heimsóknargestum um helgina sem setti marga í sóttkví eða einangrun!“

Enn meira en 600 starfsmenn Landspítala óbólusettir

Hann segir mikilvægt að muna að ef loka þurfi þjónustu á Landspítala eigi sjúklingar ekki í önnur hús að vernda til að fá þá þjónustu sem þeir þurfa. Þá hafi þátttaka starfsmanna í bólusetningum hafa verið nokkuð góð en enn séu meira en 600 starfsmenn Landspítala óbólusettir.

„Þátttaka í bólusetningum starfsmanna hefur verið nokkuð góð - um 90% eru fullbólusettir og þátttaka í endurbólusetningum var um 60%. Ennþá eru yfir 600 starfsmenn óbólusettir, af ýmsum ástæðum. Sjúklingar eru almennt vel bólusettir, sérstaklega eldri hóparnir,“ skrifar Már. 

„Hins vegar vitum við að eldri og ónæmisbældir sjúklingar svara bóluefnum misvel, því sjáum við allnokkuð af smitum í þessum hópi, margir í þeim orðið mjög veikir og nokkrir látist nú í haust. Við erum því neydd til að grípa til umfangsmeiri aðgerða á Landspítala en þörf er á úti í samfélaginu.“

Enn í hringiðunni

Már segir Landspítala enn í hringiðunni og nauðsynlegt sé að vanda sig vel í vinnu eins og áður. Grímunotkun starfsmanna hafi til að mynda margsannað gildi sitt inni á Landspítala. Meira en átta hundruð starfsmenn spítalans smitast af veirunni eða verið útsettir en enginn þeirra smitað sjúkling þegar grímur voru notaðar. 

„Engin smit hafa orðið frá starfsmönnum til sjúklinga þegar grímur hafa verið notaðar og ekki heldur milli starfsmanna ef reglum hefur verið fylgt (grímunotkun og fjarlægðarmörk). Hins vegar hafa orðið nokkur smit il starfsmanna bæði frá samstarfsfólki og eins frá sjúklingum þegar reglum um bólusetningar, grímunotkun og fjarlægðarmörk hefur ekki verið fylgt,“ skrifar Már. 

Hann bendir á að stórir faraldrar geisi nú í skólum á öllum stigum og smit í eldri hópum sem tengjast Landspítala hafi aukist. Þá fari tíðni smita hratt vaxandi auk þess sem hópsmit sé nú komið upp á hjartaskurðdeild með þeim afleiðingum að smitsjúkdómadeild var breytt í farsóttareiningu. Viðbragðsstig spítalans sé jafnframt í endurskoðun.

„Við erum því ennþá í hringiðunni og verðum að vanda okkur vel í vinnu, nú sem fyrr.“


Tengdar fréttir

Þórólfur svartsýnn og segir ekki lengur samstöðu um aðgerðir

Sóttvarnalæknir er afar svartsýnn vegna fjölda smitaðra síðustu daga. Hann óttast álag á spítalann og róðurinn sé þungur núna þegar sóttvarnaaðgerðir njóti minni stuðnings í samfélaginu, þar á meðal lítils stuðnings meðal ráðherra.

84 greindust smitaðir af veirunni í gær

Áttatíu og fjórir greindust smitaðir af Covid-19 innanlands í gær. Þetta kemur fram í uppfærðum tölum á Covid.is. 35 þeirra voru í sóttkví við greiningu, eða 42 prósent. 49 voru utan sóttkvíar, eða 58 prósent.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.