Innlent

Líkir Birgi við Júdas

Hallgerður Kolbrún E. Jónsdóttir skrifar
Þorsteinn Sæmundsson, fyrrverandi þingmaður Miðflokksins, segir Birgi Þórarinsson fyrrverandi samflokksmann sinn hafa svikið Miðflokkinn.
Þorsteinn Sæmundsson, fyrrverandi þingmaður Miðflokksins, segir Birgi Þórarinsson fyrrverandi samflokksmann sinn hafa svikið Miðflokkinn. Vísir/Vilhelm

Þorsteinn Sæmundsson, fyrrverandi þingmaður Miðflokksins, er harðorður í garð Birgis Þórarinssonar fyrrverandi samflokksmanns hans, sem tilkynnti óvænt í gær að hann væri genginn til liðs við Sjálfstæðisflokkinn aðeins tveimur vikum eftir kosningar, í skoðanagrein sem birtist á Vísi í dag.

Fyrirsögn greinarinnar er „Þingmenn til sölu – kosta eina tölu; eða 30 silfurpeninga“ og vísar hann þar til silfurpeninganna þrjátíu sem Júdas fékk að greiðslu fyrir að svíkja Jesú samkvæmt ritningu Biblíunnar.

„Fáir eru þó þeir sem hafa svo lágan siðferðisþröskuld að þeir treystast til þess að lauma sér inn á þing með hjálp heiðarlegs fólks sem hefur lagt á sig ómælda vinnu og lagt fé svo að framboðið mætti takast,“ skrifar Þorsteinn.



„Sviksemi af þessum toga er því miður fylgifiskur stjórnmála en sem betur fer fágætur. Þeir sem treystast til þess að láta atkvæði sitt falt óðar en eftir því er leitað og stökkva af vagninum sem dreginn var af heiðarlegu og hrekklausu fólki sem háði kosningabaráttu í góðri trú; Þeir sem berja sér á brjóst í síðbúinni vandlætingu til að breiða yfir sviksemi sína eru ekki margra aura virði. Hugsanlega þrjátíu silfurpeninga.“

Birgir sagði í gær að ástæða flokkaskiptanna væri Klaustursmálið svokallaða. Málið kom upp í nóvember 2018 þar sem nokkrir þingmenn Miðflokks og Flokks fólksins voru saman komnir á Klaustur bar og ræddu samstarfsmenn sína á þingi sem varð til þess að siðanefnd Alþingis úrskurðaði að tveir Miðflokksmenn hafi brotið siðareglur. Eftirminnilega gengu tveir þingmenn Flokks fólksins, sem staddir höfðu verið á Klaustri, í Miðflokkinn vegna málsins: þeir Karl Gauti Hjaltason og Ólafur Ísleifsson.

Birgir Þórarinsson var einn þeirra sem gangrýndi framgöngu samflokksmanna sinna og sagði hann í ræðu á Alþingi í janúar 2019 að ekki væri rétt að Klaustursmenn úr Miðflokknum fengju að ganga að trúnaðarstörfum sínum í flokknum. Hann sagði í viðtali við Morgunblaðið í gær að eftir þessa gagnrýni hafi samflokksmenn hans aldrei treyst honum fyllilega aftur.

Þorsteinn gagnrýnir Birgi fyrir þetta og segir að eitt sé að skipta um stjórnmálaflokk vegna málefnalegs ágreinings.

„Annað er að taka til þess ráðs þegar maður kemst ekki á lista flokks drauma sinna að orma sig inn á lista flokks sem maður „tilheyrir“ gagngert til að yfirgefa flokkinn strax að kosningum loknum og fara því inn á þing á fölskum forsendum frá byrjun. Það er lítilmennska,“ skrifar Þorsteinn í skoðanagreininni.

„Í Mattheusarguðspjalli segir: „Varist falsspámenn. Þeir koma til yðar í sauðaklæðum en innra eru þeir gráðugir vargar. Af ávöxtum þeirra skuluð þér þekkja þá.“ Við þá sem þannig koma fram segi ég: Farvel, megi uppskeran verða eins og til var sáð. Guð blessi Sjálfstæðisflokkinn.“


Tengdar fréttir

Sjálfstæðisflokkurinn ekki að ganga í Birgi Þórarinsson

Skiptar skoðanir eru á ákvörðun Birgis Þórarinssonar að ganga í Sjálfstæðisflokkinn svo skömmu eftir kosningar. Bjarni Benediktsson formaður flokksins hefur boðið Birgi velkominn í þingflokkinn, sem er orðinn sá langstærsti á þingi með sautján þingmenn.

For­maður Heim­dallar gagn­rýnir vista­skipti Birgis

Veronika Steinunn Magnúsdóttir, formaður Heimdallar, félags ungra Sjálfstæðismanna í Reykjavík, telur að vistaskipti Birgis Þórarinssonar þingmanns úr Miðflokki yfir í Sjálfstæðisflokkinn geri verulega lítið úr prófkjörsbaráttu síðarnefnda flokksins, sem og vilja kjósenda hans.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×