Innlent

Mögu­lega ekki greið­fært með at­kvæði yfir fjall­vegi í kvöld

Kjartan Kjartansson skrifar
Þessi ferfætlingur var ekki á kjörskrá í Reykjavík en kjörsókn er þó meiri en fyrir fjórum árum. Frá kjörstað í Ráðhúsi Reykjavíkur í morgun.
Þessi ferfætlingur var ekki á kjörskrá í Reykjavík en kjörsókn er þó meiri en fyrir fjórum árum. Frá kjörstað í Ráðhúsi Reykjavíkur í morgun. Vísir/Vilhelm

Kaldara og lygnara er í veðri víða á landinu í dag en veðurspár gerðu ráð fyrir fyrr í vikunni. Veðrið er því ólíklegt til að hafa áhrif á kjörsókn en gæti sett strik í reikninginn þegar flytja þarf atkvæði yfir fjallvegi í kvöld, að sögn veðurfræðings.

Fyrr í vikunni var spáð afleitu veðri á kjördag, suðvestan rigningarstormi. Áhyggjur voru af því að slíkt veður gæti dregið úr kjörsókn og seinkað talningu sums staðar á landsbyggðinni þar sem flytja þarf atkvæði yfir fjallvegi eða sjóleiðina.

Lægðin sem veldur veðrinu hefur þó tekið breytingum og vindur er nú norðlægari, að sögn Teits Arasonar, veðurfræðings á Veðurstofu Íslands. Víða er allshvasst eða strekkingur. Kaldara veður þýðir að úrkoma sem er spáð á landinu norðan- og austanverðu fellur líklega sem snjór eða slydda á heiðum og fjallvegum.

„Það er möguleiki að það verði ekki greiðfært með atkvæðin yfir fjallvegi eftir að kjörstaðir loka í kvöld,“ segir Teitur.

Í versta falli geti björgunarsveitir þó flutt atkvæðin en þær hafi oft lagt á heiðar í verra veðri en spáð er í kvöld.

Á láglendi ætti hins vegar að vera greiðfært alls staðar. Teitur segir breytingarnar á veðrinu frá fyrri spám betri fyrir kjörsókn. „Í slagviðri eins og átti að vera hefðu kannski einhverjir síður farið á kjörstað,“ segir hann.

Á höfuðborgarsvæðinu er prýðilegasta veður en það er ekki dæmigert fyrir veðrið annars staðar á landinu. Teitur segir langbesta veðrið á landinu þar. Ekki er spáð úrkomu og þá er stór hluti borgarinnar í skjóli fyrir vindáttinni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.