„Ef ég ætlaði að kýla einhvern hefði þetta endað öðruvísi“

Kjartan fékk að líta rauða spjaldið eftir að hafa slegið til Þórðar Ingasonar, varamarkvarðar Víkings, sem kominn var inn á völlinn. Framherjinn stóri og stæðilegi segist þó aðeins hafa ætlað sér að ýta Þórði, fyrrverandi liðsfélaga sínum hjá KR, í burtu en gert það of harkalega.

Atvikið má sjá hér að neðan. Kjartan hefur beðist afsökunar á framferði sínu en bendir jafnframt á að fleiri hafi farið fram úr sér, og segir að ef hann hefði ætlað að beita hnefahöggi hefði það haft mun alvarlegri afleiðingar.

Svona lýsir Kjartan atburðarásinni í lok leiks, þegar vítaspyrna var dæmd á Víkinga og upp úr sauð:

„Kári [Árnason] liggur þarna og við erum nálægt því að skora, og mér er hrint inn í markið og enda einhvern veginn á stönginni. Þegar ég lít upp sé ég að það eru 20 manns að slást þarna. Ég sé að Doddi [Þórður] félagi minn er þarna kominn inn á og er eitthvað að slá til og rífa í Theódór Elmar. Ég kem þarna askvaðandi og ætla að hrinda honum fast í burtu, og enda á að fara einhvern veginn í hálsinn eða hökuna.

Ég var bara í „fighting“ eins og 20 aðrir í þessari þvögu, og fæ svo réttilega rautt spjald. En þarna var kominn leikmaður inn á sem átti ekki að vera á vellinum og ég fer að hrinda og reyna að verja þá en ef ég ætlaði að kýla einhvern hefði þetta endað öðruvísi. Ég ætlaði ekki að kýla neinn heldur bara hrinda í burtu,“ segir Kjartan.

Hann tekur þó undir að atvikið líti illa út á myndbandi: „Ég er alveg sammála því, enda biðst ég afsökunar á því sem ég gerði.“

„Fullt af karakterum í báðum liðum“

Mikill hiti virðist vera á milli leikmanna KR og Víkings, og til að mynda fengu þrír Víkingar rautt spjald þegar liðin áttust við á Meistaravöllum í fyrra.

„Ég var ekki með í fyrra en fylgdist auðvitað með því. En þetta eru bara tvö góð lið og fullt af karakterum í báðum liðum. Auðvitað skiptir það máli. En ég verð að segja að dómarinn fannst mér dæma leikinn frábærlega og hafa mjög góð tök á erfiðum leik þar sem mikið var undir. Svona eiga leikir að vera, en auðvitað ekki eins og þetta var í lokin á leiknum. Slíkt á ekki að sjást á fótboltavellinum,“ segir Kjartan.

Vel afgreitt hjá dómaranum

Hann dregur ekki dul á að hann hafi verðskuldað rautt spjald í gær:

„Jú, klárlega. Eins og hann [Þórður] segir þá fór ég í andlitið á honum og það verðskuldar rautt spjald. Hann fékk líka rautt og það voru fleiri þarna… Dómarinn [Þorvaldur Árnason] hefði alveg getað tekið einhverja spjaldahrinu. Það voru allir að hrinda öllum, klípa og stíga á tær. Það er ekki súmmað inn á allt. Hann hefði alveg getað spjaldað fleiri en mér fannst þetta mjög vel afgreitt hjá honum og ég hef ekkert út á það að setja,“ segir Kjartan.

Knúsaði Þórð og hló með honum

Hann náði fljótt sáttum við Þórð eftir leik:

„Ég fór bara beint til hans eftir leikinn og við fórum nú bara að hlæja að þessu og knúsuðumst. Ég kom aftur út á völlinn og tók í höndina á öllum þeim Víkingum sem ég náði á og óskaði þeim alls hins besta, og þakkaði fyrir leikinn. Svo heldur lífið áfram,“ segir Kjartan.

Kjartan segist heldur kjósa að athyglin beinist að frábærri spilamennsku Víkinga og stöðu þeirra á toppi Pepsi Max-deildarinnar. Hann spyr sig jafnframt að því hvort athyglin sé meiri á sér en öðrum þegar menn fari yfir strikið.

„Þetta var ótrúlega skemmtilegur leikur að spila, fullkomnar aðstæður og mikil stemning í stúkunni, sem er eitthvað sem hefur saknað svolítið í sumar. Víkingarnir eru auðvitað búnir að vera frábærir og einhver meistaralykt af þeim, margt gengið upp og þeir hafa unnið fyrir því. Áhorfendur fengu alla vega allt fyrir peninginn. Þetta gat ekki verið dramatískara. Og mér finnst að fókusinn eigi að vera á það hversu frábærir Víkingarnir eru og hvað þeir eru að gera.“