Víta­spyrnurnar sem breyttu gangi máli á Ís­lands­mótinu

Erfitt er að lýsa leikjum gærdagsins með orðum enda einhver svakalegasta dramatík sem menn hafa upplifað. Arnar Gunnlaugsson - þjálfari Víkinga - er eldri en tvævetur og upplifði margt á ferli sínum sem atvinnumaður. Hann sagðist hins vegar einfaldlega „hafa misst sig“ í hamagangnum er hans menn heimsóttu KR vestur í bæ.

Víkingar hófu gærdaginn í öðru sæti Pepsi Max-deildarinnar á meðan Breiðablik var á toppnum eftir að hafa unnið sjö leiki í röð og virst ósigrandi. Það breyttist í gær er Blikar heimsóttu Kaplakrika og mættu þar lærisveinum Ólafs Jóhannessonar í FH.

Breiðablik var einu marki undir í Hafnafirði er brotið var á Árna Vilhjálmssyni á 76. mínútu leiksins. Á sama tíma er staðan 1-1 í Vesturbænum og Blikar því eins stigs forystu á toppi deildarinnar.

Árni – sem skoraði úr vítaspyrnu í 3-0 sigrinum á Val fyrir aðeins örfáum dögum – brenndi af. Hann skaut yfir.

„Ótrúlegar senur hér í Kaplakrika!!! Blikar fá dæmda vítaspyrnu upp úr þurru. Árni stígur á punktinn en setur boltann langt yfir markið!! Er stressið að fara með Blika,“ segir í textalýsingu Vísis frá Kaplakrika. 

Fór það svo að leiknum í Kaplakrika lauk með 1-0 sigri FH.

Á sama tíma og flautað var til leiksloka í Hafnafirði voru Víkingar komnir 2-1 yfir í Frostaskjóli og því á leið á topp deildarinnar. Það er þangað til Kári Árnason virtist handleika knöttinn innan vítateigs í uppbótartíma og allt fór fjandans til í Vesturbænum.

Eftir að hafa ráðfært sig við aðstoðardómara sinn, og lyft rauða spjaldinu alls þrívegis, benti Þorvaldur Árnason, dómari leiksins, á vítapunktinn. Í endursýningum af atvikinu var nær ómögulegt var að sjá hvort Kári hafi handleikið knöttinn og í viðtali eftir leik sagði hann svo ekki hafa verið.

Það skipti þó litlu máli hér er Pálmi Rafn Pálmason stillti boltanum upp. Ingvar Jónsson – markvörður Víkinga – sem hafði varið vítaspyrnu í dramatískum 1-0 sigri á Fylki í 8-liða úrslitum Mjólkurbikarsins fyrir skömmu og endurtók leikinn í Frostaskjólinu.

Spyrna Pálma Rafns var nokkuð lík þeim fjórum vítaspyrnum sem hann hefur tekið til þessa á leiktíðinni. Raunar má fara lengra aftur í tímann.

Þær eru nákvæmar en ekki fastar og fara nær alltaf í vinstra hornið frá honum séð.  Ingvar las það og varði vel með hægri hendi út við stöng. Í kjölfarið trylltust Víkingar af gleði. 

Skipti engu máli hvort þeir voru inn á vellinum, á varamannabekknum eða upp í stúku. Farið var yfir atvikið sem leiddi til vítaspyrnudómsins sem og spyrnuna sjálfa í Pepsi Max Stúkunni að leik loknum.

Skömmu síðar var leikurinn flautaður af, Víkingar fóru með 2-1 sigur af hólmi og eru nú í toppsæti Pepsi Max deildar karla með eins stigs forystu á Breiðablik fyrir lokaumferð deildarinnar.

Lokaumferðin fer fram á laugardaginn kemur, þann 25. september. Breiðablik fær HK í heimsókn á meðan Víkingur fær Leikni Reykjavík í heimsókn. 

Bæði lið þar að mæta fornum fjendum og ef eitthvað er að marka gærdaginn gæti vel verið að við sjáum pendúlinn sveiflast allavega einu sinni, ef ekki tvisvar, á meðan leik stendur.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði.