Menning

Með mölbrotna sjálfsmynd og lifir fyrir samþykki fólks

Sylvía Rut Sigfúsdóttir skrifar
Uppistandarinn Stefán Ingvar Vigfússon frumsýnir nýtt efni í næstu viku.
Uppistandarinn Stefán Ingvar Vigfússon frumsýnir nýtt efni í næstu viku. VHS

„Við höfum svolítið talað um að fólk eigi að búa sig undir ótrúlegasta uppistand Íslandssögunar, ég held mig við það,“ segir Stefán Ingvar Vigfússon uppistandari og meðlimur VHS.

Þann 3. september næstkomandi verður sýningin VHS krefst virðingar frumsýnd í Tjarnarbíói.

„Þetta verður show. Þetta er þriðja leikárið sem við sýnum í Tjarnarbíó og núna, þegar við erum komin fjölbreyttari reynslu af sýningarrýmum, erum við komin með virkilega góðan skilning á húsinu og salnum. Við ætlum að nýta allt sem Tjarnarbíó hefur upp á að bjóða. Ég vil ekki gefa of mikið upp, enda er sjón sögu ríkari, en þarna verður eitthvað fyrir öll,“ segir Stefán Ingvar.

Takmarkanirnar svekkjandi

VHS samanstendur af Stefáni Ingvari og þeim Villa Neto, Vigdísi Hafliðadóttur og Hákoni Erna Helgasyni.

„Við erum mjög spennt að fá að halda sýningu í Tjarnarbíó með svona þokkalega eðlilegu sniði. Það er búið að vera mjög svekkjandi að vinna í sviðslistum og sjá öllu létt af yfir sumarið, þegar fæst eru að drífa sig inn í gluggalausan sal, og síðan skellt aftur í lás á haustin, þegar við getum byrja að vinna eitthvað að viti aftur. Ég verð samt að segja að vorum við frekar heppin undanfarin vetur, við náðum að sýna VHS biðst forláts, síðustu sýninguna okkar, svona sex sinnum, og síðan héldum við tilraunauppistandið Nýtt ár, nýtt grín alveg níu sinnum í janúar og febrúar. Það voru náttúrulega allskonar takmarkanir á öllum þeim sýningum. Það var rosalega svekkjandi þegar við vorum búin að selja tvö hundruð miða á VHS biðst forláts og síðan var herrt og þá máttu bara fimmtíu þeirra koma, það var áskorun að sýna fyrir það fáa í eins stórum sal og Tjarnarbíó.“

VHS krefst virðingar er fjórða sýning uppistandshópsins VHS, en tvær fyrri sýningar hópsins Endurmenntun og VHS biðst forláts gengu fyrir fullu húsi í Tjarnarbíó og viða um landið. Endurmenntun var send út á miðlum RÚV um jólin 2019. VHS biðst fyrir, jólasýning hópsins 2020, var sýnd í beinu streymi og var táknmálstúlkuð. Auk þess hefur VHS staðið fyrir vinsælum tilraunasýningum í Tjarnarbíó og á Húrra. Stefán Ingvar segir að það sé mikill munur á að halda svona sýningar fyrir framan áhorfendur miðað við að sýna þá í streymi.

„Það er auðvitað svona áttatíu þúsund sinnum skemmtilegra að hafa áhorfendur. Við lögðum mjög mikinn metnað í öll þessi streymisgigg og sýninguna sem við streymdum. Ég lít svolítið á þetta streymistímabil uppistandsins, sem ég vona að sé endanlega að lokið, eins og virkilega góðan skóla. Við vorum að gigga frekar þétt á tímabili og keyptum okkur allskonar tæki og tól til þess að hafa þetta sem allra best fyrir áhorfendur og síðan vorum við yfirleitt saman, þótt bara eitt okkar var að sýna, gáfum þá nótur eftir á og töluðum um giggið. Þetta var rosaleg æfing í því að standa með grínhugmynd, ég er sjálfur með gjörsamlega mölbrotna sjálfsmynd og lifi fyrir samþykki fólks. 

Þegar það var síðan tekið af mér, það að finna fyrir samþykku áhorfenda, þá þurfti að hafa trú á eigin ágæti, standa með því og vita hvernig tiltekinn brandari virkar best. 

Þá vinnu tek ég með mér, og við öll hugsa ég, inn í VHS krefst virðingar.“

VHS hópurinn samanstendur af Villa Neto, Vigdísi Hafliðadóttur, Hákoni Erna Helgasyni og Stefáni Ingvari Vigfússyni.VHS

Henda meirihlutanum

Stefán Ingvar segir að þau hafi í raun byrjað að vinna í þessari sýningu síðasta haust þegar þau þurftu að hætta að sýna VHS án forláts.

„Við vorum sjúklega ánægð með hana og vildum gjarnan halda áfram, en þú veist, faraldurinn. Þá förum við að hugsa um hvað við gætum gert betur næst og hvernig við gætum stækkað showið. Við sýndum svo jólasýninguna okkar í streymi í desember og byrjuðum strax að skrifa þessa í janúar. 

Þá vorum við níu tilraunasýningar á tveimur mánuðum, það er alltaf ógeðslega gaman. Þá förum við inn á svið með hugmynd sem við útfærum bara fyrir framan áhorfendur, við hendum auðvitað megninu af því, en margar kveikjur að VHS krefst virðingar fæddust þarna. 

Við héldum síðan þrjár tilraunsýningar í viðbót, á Flateyri, Rifi á Snæfellsnesi og síðast á Húrra. Þannig að við erum með virkilega slípaða brandara, og auðvitað slatta sem við eigum eftir að segja,“ segir Stefán Ingvar. 

Vinir síðan í menntaskóla

„Við vildum líka færa þetta dæmi út fyrir sviðið. Við Hákon skrifuðum sketsa sem við erum að nota sem kynningarefni, hann leikstýrði því og ég framleiddi og þeir eru búnir að fá rosalega góðar viðtökur og síðast en ekki síst gerðum við bjór með Ægi brugghúsi. Við vorum einmitt að fá þá í hendurnar í þessari viku, það er það ruglaðasta sem við höfum gert. Ég er eiginlega búinn að vera í kasti í allan dag yfir því að uppistandshópurinn VHS eigi sinn eiginn bjór núna, og ég drekk ekki einu sinni sjálfur,“ segir Stefán Ingvar.

Hann er ótrúlega ánægður með viðbrögðin. Uppselt er á fyrstu sýninguna og stutt er í að uppselt verði á næstu sýningu líka.

„Dýnamíkin í hópnum er frábær. Við höfum öll verið vinir heillengi, vorum öll í MH og þekkjumst þaðan. Við höfum farið tvisvar sinnum á túr saman og það eru bara jólin fyrir mér, að ferðast um landið með fyndnasta fólki sem ég þekki og segja fólki brandara. Alveg svona draumur að rætast dæmi.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.