Innlent

Heil­brigðis­ráðu­neytið treysti ekki rann­sóknar­stofu Krabba­meins­fé­lagsins

Hólmfríður Gísladóttir skrifar
Það tók ráðuneytið sex vikur að svara fyrirspurn kvennanna en Facebook-hópurinn telur nærri 17 þúsund meðlimi.
Það tók ráðuneytið sex vikur að svara fyrirspurn kvennanna en Facebook-hópurinn telur nærri 17 þúsund meðlimi.

Það er mat heilbrigðisráðuneytisins að rannsóknarstofa Krabbameinsfélagsins hafi ekki uppfyllt gæðaskilyrði til að sinna rannsóknum á leghálssýnum. Þetta kemur fram í svari ráðuneytisins við fyrirspurn sem send var fyrir hönd Facebook-hópsins „Aðför að heilsu kvenna“.

Þar segir að í kjölfar „alvarlegra gæðavandamála“ hjá Krabbameinsfélagi Íslands, hafi öryggi kvenna og gæði rannsókna á leghálssýnum verið best tryggt með samningi við rannsóknarstofu Hvidovre-sjúkrahússins.

„Bent er á að á þeim tíma þegar samningur við rannsóknarstofu Hvidovre-sjúkrahússins var gerður, var ekki til staðar nein rannsóknarstofa á Íslandi sem gat tekið verkefnið að sér að uppfylltum settum gæðaskilyrðum,“ segir í svarinu.

Þar kemur hins vegar ekki fram að þrátt fyrir að það hefði legið fyrir í heilt ár að skimunarverkefnið yrði fært frá KÍ til Heilsugæslunnar á höfuðborgarsvæðinu um áramótin síðustu, var ekki gengið frá samningi við Hvidovre-sjúkrahúsið fyrr en í febrúar á þessu ári.

Þá áttu sér aldrei stað viðræður við Landspítala um að taka að sér rannsóknirnar, fyrr en nú, eftir hörð mótmæli kvenna og heilbrigðisstarfsfólk.

Í svarinu segir að unnið sé að undirbúningi þess að Landspítalinn sinni rannsóknunum en að honum loknum verði samningnum við Hvidovre-sjúkrahúsið sagt upp.

Þar kemur einnig fram að það var ekki fyrr en um áramótin, þegar Heilsugæslan tók við verkefninu, að landlæknisembættinu var falið að halda utan um svokallaða skimunarskrá og að samið var við KÍ um kaup á tölvukerfum félagsins.

Þar segir að mikil vinna hafi farið í að aðlaga upplýsingakerfið að aukinni sjálfvirkni en kerfið frá KÍ hafi verið komið til ára sinna. Eins og fram hefur komið má rekja það til þeirrar óvissu sem hefur ríkt um framtíðartilhögun skimunarmála á Íslandi um árabil.

Biðin eftir niðurstöðum úr rannsóknum er sagður vera sex vikur en hefur farið í allt að fimm mánuði eftir að Heilsugæslan tók við verkefninu.

„Eftiráskýringar“

Konurnar sem sendu fyrirspurnina fyrir hönd Facebook-hópsins sendu frá sér tilkynningu í morgun, þar sem þær gagnrýna meðal annars að það hafi tekið ráðuneytið sex vikur að svara.

Þær segja vandamálið ekki eingöngu snúa að þeirri ákvörðun að senda rannsóknirnar úr landi, heldur sé það óafsakanlegt hversu undirbúningnum við flutning verkefnisins var ábótavant.

„Ljóst er að hvorki heilbrigðisráðuneytið né heilsugæslan hafa metið umfangið á þeim breytingum sem gerðar voru og staða verkefnisins er því miður enn ekki á þeim stað sem notendur þjónustunnar gera kröfu um og lög um sjúklinga nr. 74/1997 áskilja,“ segir í tilkynningunni.

Svör ráðuneytisins eru máttlaus, segir þar.

„Nú er enn bætt við nýrri skýringu á stöðunni og talað um að samkæmt skýrslu frá EL hafi verið alvarleg gæðavandamál hjá Krabbameinsfélagi Íslands sem hafi orðið til þess valdandi að samið hafi verið við rannsóknastofuna í Hvidovre. Þetta er eftir á skýring sem við teljum að standist ekki skoðun.“

Þá segir að sú þarfagreining sem nú standi yfir með Landspítalanum og öðrum sem að verkefninu koma hefði átt að eiga sér stað fyrir tveimur árum.

„Þegar upp er staðið blasir við sú vanvirðing sem íslenskum konum hefur verið sýnd í öllu þessu ferli. Einnig kemur fram í umræddu svarbréfi að samræður séu við ytri hagsmunaaðila en notendur þjónustunnar eru hvergi nefndar á nafn, þó má ætla það að notendur þjónustunnar séu raunverulega stærstu hagsmunaaðilarnir.“

Konurnar munu eiga stuttan fund með heilbrigðisráðherra við ráðuneytið kl. 13 í dag.


Tengdar fréttir

Konurnar fái niðurstöður í þessari eða næstu viku

Þær konur sem beðið hafa lengst eftir svörum vegna leghálsskimana eiga von á niðurstöðum í þessari viku eða þeirri næstu. Þetta segir framkvæmdastjóri lækninga hjá Heilsugæslunni á höfuðborgarsvæðinu.

Konur sem fóru í skimun í mars bíða enn svara

Þær konur sem beðið hafa lengst eftir svörum vegna leghálsskimunar hafa beðið meira en fjóra mánuði. Konur sem fóru í skimun í lok mars eiga enn eftir að fá niðurstöðu. Þetta kemur fram í svörum Heilsugæslunnar á höfuðborgarsvæðinu við fyrirspurn Vísis.

Kristján segir sig frá krabba­meins­skimunum

Kristján Oddsson, svæðisstjóri Heilsugæslunnar Hamraborgar, hefur sagt sig frá Samhæfingarstöð krabbameinsskimana, sem hann hefur stýrt frá miðju síðasta ári. Samhæfingarstöðin sá meðal annars um skimanir fyrir leghálskrabbameini eftir að þær voru færðar frá Krabbameinsfélagi Íslands til Heilsugæslunnar.

„Þetta er grafalvarlegt mál“

Á þriðja tug kvenna hafa kvartað til umboðsmanns Alþingis vegna stöðu skimana fyrir leghálskrabbameini hér á landi. Umboðsmaður segir um grafalvarlegt mál að ræða og að hann fylgist grannt með stöðu mála.

Heilsugæslan segist ekki „henda“ sýnum

Forsvarsmenn Heilsugæslunnar á höfuðborgarsvæðinu segjast ekki „henda“ sýnum sem berast Samhæfingarstöð krabbameinsskimana. Þetta kemur fram í tilkynningu á vef heilsugæslunnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.