Íslenski boltinn

Um ó­trú­lega björgun Sölva Geirs: Talandi um að vera stríðs­­maður og fórna sér fyrir mál­­staðinn

Runólfur Trausti Þórhallsson skrifar
Sölvi Geir setti höfuðið þar sem fæstir þora að setja fæturnar í gær.
Sölvi Geir setti höfuðið þar sem fæstir þora að setja fæturnar í gær. Vísir/Hulda Margrét

Sölvi Geir Ottesen, fyrirliði Víkinga, var óvænt í stöðu hægri bakvarðar í stórleik Víkings og Vals í Pepsi Max deild karla. Þessi 37 ára gamli leysti það verkefni óaðfinnanlega að mati Reynis Leóssonar, sérfræðings Pepsi Max Stúkunnar.

„Hann var algjörlega frábær. Yfirvegaður á boltanum, fór ekki mikið fram en það var aldrei vesen þegar hann var á boltanum. Það fór enginn framhjá honum, allan leikinn. Hann vann auðvitað sína skallabolta en hann er svo klókur, kemur sér í góðar stöður og þetta atvik þarna er alveg galið. Talandi um að vera stríðsmaður og fórna sér fyrir málstaðinn. Hann er óhræddur og bjargar þarna marki,“ sagði fyrrum miðvörðurinn Reynir um frammistöðu Sölva Geirs í 2-1 sigri Víkinga á Íslandsmeisturum Vals.

Atvikið sem um er ræðir er þegar Sölvi Geir liggur á marklínunni og hendir sér með höfuðið á undan til að koma í veg fyrir mark. Atvikið má sjá hér að neðan.

„Þetta er dirfska á háu stigi hjá Sölva Geir Ottesen, fyrirliða Víkinga. Sjáum hann hér skutla sér á boltann og setja hvirfilinn í hann til þess að bjarga marki. Það má segja að hann hafi lagt allt í sölurnar,“ bætti Kjartan Atli Kjartansson, þáttastjórnandi, við er endursýningar af atvikinu rúlluðu.

„Arnar (Gunnlaugsson, þjálfari Víkinga) talaði um það að stundum fær maður svona hugdettur og hann lét af því verða,“ bætti Kjartan Atli við um ákvörðun Arnars að setja Sölva Geir í hægri bakvörðinn.

„Yfirleitt þegar Arnari hefur dottið eitthvað í hug á þessu tímabili þá hefur það gengið upp. Ráku margir upp stór augu þegar Ingvar (Jónsson) er allt í einu kominn í markið. Þórður (Ingason) er búinn að standa sig vel en hann var með einhverja maga tilfinningu að núna á endasprettinum ætlaði hann að gefa Ingvari tækifæri. Hann var frábær í dag,“ sagði Reynir í kjölfarið.

„Þessi hugmynd – að setja Sölva Geir í hægri bakvörðinn, ég átti ekki von á því. Heimir (Guðjónsson, þjálfari Vals) átti ekki von á því fyrir leikinn. Hann hélt að Kári Árnason yrði á miðjunni eða þeir væru í fimm manna vörn. Þannig að þessir hlutir eru að ganga upp og Sölvi eins og hann er, tekur þessari áskorun og rúllar henni upp með leik upp á tíu,“ sagði Reynir að endingu um magnaða frammistöðu Sölva Geirs.

Klippa: Stúkan: Ótrúleg björgun Sölva Geirs

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.


Tengdar fréttir

Arnar Gunnlaugss.: Við vorum með 11 hetjur í kvöld

Arnar Gunnlaugsson var heldur betur ánægður með sína menn þegar þeir unnu Valsmenn í toppslag 18. umferðar Pepsi Max deildarinnar. Hann var sérstaklega ánægður með fyrri hálfleikinn en einnig hvernig liðið hans er að vaxa og dafna.

Umfjöllun og viðtöl: Víkingur - Valur 2-1 | Víkingar frábærir er þeir jöfnuðu Valsmenn að stigum á topp deildarinnar

Víkingur átti einn besta hálfleik sem sést hefur til að vinna Valsmenn á heimavelli fyrr í kvöld 2-1. Kwame Quee og Viktor Örlygur Arnarson sáu um að skora en bæði mörkin komu í fyrri hálfleik sem var algjörlega í eign hiemamanna sem létu Valsmenn líta mjög illa út. Leikurinn jafnaðist í seinni hálfleik en Víkingur var heilt yfir betra liðið og unnu leikinn verðskuldað.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.