Innlent

Skoða ekki persónuleg samskipti lögreglumanna „um daginn og veginn“

Tryggvi Páll Tryggvason skrifar
Nefnd um eftirlit með lögreglu hvetur lögreglumenn til að nota búkmyndavélarnar.
Nefnd um eftirlit með lögreglu hvetur lögreglumenn til að nota búkmyndavélarnar.

Nefnd um eftirlit með lögreglu hefur ritað öllum lögreglumönnum í landinu bréf þar sem áréttað er að nefndin hlusti ekki eftir persónulegum samskiptum á milli lögreglumann „um daginn og veginn“ þegar nefndin skoðar efni úr búkmyndavélum lögreglumannna vegna kvartana yfir störfum þeirra.

 Undanskilið er þó ef samskiptin varði skýra afstöðu lögreglumanna eða framkomu gagnvart þeim sem afskipti voru höfð að.

Bréfið sent af gefnu tilefni

Bréfið var birt á vef nefndarinnar fyrir helgi en greint var frá efni bréfsins á vef RÚV fyrr í dag. Segir í bréfinu að áréttingin um að ekki sé hlustað eftir persónulegum samskiptum á upptökum úr búkmyndavélunum sé sett fram „af gefnu tilefni“.

Ætla má að bréfið sé sent vegna umræðu um skoðun nefndarinnar á upptökum úr búkmyndavélum tveggja lögreglumanna sem voru við störf í Ásmundarsal í desember í tengslum við Ásmundarsalsmálið svokallaða sem rataði í fjölmiðla á aðfangadagsmorgun. Taldi nefndin að samtal lögreglumannanna á vettvangi hafi verið ámælisvert, en það var á þessa leið:

Annar lög­­reglu­mannanna: „Hvernig yrði frétta­til­­kynningin… 40 manna einka­­sam­­kvæmi og þjóð­þekktir ein­staklingar… er það of mikið eða?“

Hinn lög­­reglu­­maðurinn svarar: „Ekki fyrir mig, ég myndi lesa það…“

Og segir einnig: „Ég þekkti tvær stelpur þarna uppi og þær eru báðar sjálf­­stæðis… svona… frama­potarar eða þú veist.“

Formaður Landssambands lögreglumanna sagði í kjölfarið á þessu áliti nefndarinnar að til skoðunar vær að fá úr því skorið hvort einkasamtöl lögreglumanna sem tekin eru upp á búkmyndavélar þeirra teljist til gagna sem eigi að afhenda þegar störf lögreglu eru til rannsóknar.

Hætta væri á því að lögreglumenn dragi úr notkun búk- og bílamyndavéla ef hætta er á að einkasamtöl þeirra verði skoðuð við rannsókn mála.

Segja búkmyndavélar hafa í auknum mæli nýst til að sýna fram á tilhæfuleysi kvartana

Í bréfinu er það áréttað að eitt af markmiðum með notkun búkmyndavéla lögreglumanna sé að varpa ljósi á málsatvik þegar ágreiningur er um atvikalýsingu af vettvangi. Þá telji nefndin að notkun slíkra myndavéla gagnist vel í að upplýsa hver málsatvik eru í þeim málum sem berast nefndinni, sem meðal annars hefur það hlutverk að taka við tilkynningum frá borgurum sem varða ætlaða refsiverða háttsemi starfsmanns lögreglu, starfsaðferðir lögreglu eða framkomu starfsmanns lögreglu.

Eru lögreglumenn hvattir til þess að nota búkmyndavélar samkvæmt verklagsreglum, enda hafi það reynst nefndinni vel að geta notað slík gögn sem hún segir að hafi oftar en ekki sýnt fram á tilhæfuleysi kvartana, bæði yfir starfsháttum og framkomu lögreglumanna, þó til séu dæmi um hið gagnstæða.

Er sérstaklega áréttað í bréfinu að ekki sé hlustað eftir persónulegum samskiptum lögreglumanna sem ekki tengist því sem nefndin fjalli um hverji sinni.

„Nefnd um eftirlit lögreglu telur einnig rétt að fullvissa lögreglumenn um að nefndin skoðar einungis það er varðar umkvörtunarefni borgara en ekki persónuleg samskipti lögreglumanna sín á milli um daginn og veginn.“


Tengdar fréttir

Sam­­tal lög­­reglu­mannanna hafi lýst for­dómum

For­maður nefndar um eftirlit með lög­reglu (NEL) segir ljóst að sam­tal lög­reglu­mannanna tveggja við Ás­mundar­sal, sem nefndin taldi á­mælis­vert, hafi ekki verið per­sónu­legt. Það hafi snúið beint að þeim sem lög­regla hafði af­skipti af á vett­vangi, lýst for­dómum og því fullt til­efni fyrir nefndina að fjalla sér­stak­lega um það.

Segja enga tilraun hafa verið gerða til að leyna upptökum

Eftirlitsnefnd með störfum lögreglunnar hafði frá upphafi nákvæmt eftirrit af ummælum lögregluþjóna sem sinntu umdeildu útkalli í Ásmundarsal á Þorláksmessu og engin tilraun var gerð til þess að leyna því sem kom fram á upptökum búkmyndavéla þeirra, að sögn lögreglunnar á höfuðborgarsvæðinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.