Fótbolti

Nýjar reglur í Skotlandi þýða að Blikar geta spilað fyrir fullum velli

Valur Páll Eiríksson skrifar
Blikar unnu góðan 2-1 sigur á Austria Vín í síðustu viku og mæta Aberdeen frá Skotlandi í næstu umferð Sambandsdeildarinnar.
Blikar unnu góðan 2-1 sigur á Austria Vín í síðustu viku og mæta Aberdeen frá Skotlandi í næstu umferð Sambandsdeildarinnar. Vísir/Hulda Margrét

Nicola Sturgeon, forsætisráðherra Skotlands, tilkynnti í dag um breytingar á reglum vegna kórónuveirufaraldursins í Skotlandi. Dregið verður úr fjöldatakmörkunum á íþróttaviðburðum að því gefnu að ákveðin skilyrði séu uppfyllt. Reglurnar taka gildi fyrir leik Breiðabliks við Aberdeen ytra í næstu viku.

Tvö þúsund áhorfendur hafa verið leyfðir á íþróttaviðburðum í Skotlandi síðustu vikur en skipuleggjendur hafa getað sótt um undanþágu til að taka á móti stærri fjölda. Samkvæmt tilkynningu Sturgeon í dag mun breyting verða þar á frá mánudeginum 9. ágúst næst komandi.

Samhliða því sem grímuskylda verður lögð niður ásamt fjarlægðarreglum, verður sá lágmarksfjöldi hækkaður í fimm þúsund. Áfram geta ábyrgðarmenn íþróttaviðburða, svo sem skosk félagslið í fótbolta, sótt um að hleypa fleirum að og allt að því fylla velli landsins. Sturgeon segir að slíkar umsóknir um leyfi fyrir fleirum sé öryggisráðstöfun.

„Meðan við vinnum okkur hægt og bítandi í átt endurkomu stórra viðburða munum við, til skamms tíma, halda okkur við vinnulagið þar sem skipuleggjendur viðburða utandyra með yfir 5000 manns og innandyra með yfir 2000 manns þurfa að sækja um leyfi,“

„Þetta gerir okkur og sveitarfélögum kleift að vera þess fullviss að ákveðin skref séu tekin til að draga úr áhættu þegar kemur að stórum viðburðum,“ hefur Sky Sports eftir Sturgeon.

Rúmlega 6300 manns sáu fyrsta leik Aberdeen í skosku úrvalsdeildinni um helgina þar sem þeir unnu 2-0 sigur á Dundee á heimavelli sínum Pittodrie.

Breiðablik sækir Aberdeen heim í Sambandsdeild Evrópu á fimmtudaginn í næstu viku, eftir að nýjar reglur taka gildi, og má því búast við töluvert fleirum á Pittodrie, sem tekur rúmlega 20 þúsund manns í sæti.

Fyrri leikur liðanna er á fimmtudagskvöld á Laugardalsvelli, þar sem Kópavogsvöllur uppfyllir ekki kröfur UEFA á þessu stigi keppninnar. Ekki má fylla stúkuna þar vegna 200 manna samkomutakmarkana hér á landi.

Leikurinn hefst klukkan 19:00 á fimmtudaginn og verður sýndur beint á Stöð 2 Sport.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.