Kópa­vogs­búar hjóla í nýju fjalla­hjóla­brautina sína

Kópavogsbær kynnir stoltur fjallahjólabrautina við Austurkór á síðu sinni en hún var kosin af íbúum bæjarins í hugmyndasöfnun Okkar Kópavogs 2020 - 2021.

„Framkvæmdum á brautinni lauk vorið 2021 en þar geta ungir jafnt sem aldnir hjólað og spólað eins og þeim lystir,“ segir sá sem heldur um penna fyrir hönd bæjaryfirvalda. Og með fylgja myndir af þessari nýjung bæjarins; sérstaklega sett upp íbúum til skemmtunar og heilsubótar. 

Þetta er engin fjallahjólabraut!

En undirtektir eru ekki í samræmi við væntingar. Reyndar langt í frá. Holskefla skamma rigna yfir þá sem höfðu með framkvæmdina að gera.

„Þetta er engin fjallahjólabraut! Þetta eru rennisléttir malarstígar sem nóg er af í okkar nærumhverfi. Þið skuldið nú börnunum í hverfinu lagfæringu á þessu sem fyrst og hefði verið allt í lagi að leita á netinu hvað fjallahjólabraut er áður en menn fóru í framkvæmdir,“ segir Bjarni Antonsson forviða. Og þannig gengur dælan:

„Er þetta grín? Þvílík vanvirðing við íbúana að eyða peningum í þetta rugl. 

Það tekur ca 3 sekúndur að gúgla fjallahjólabraut eða mountain bike path til að skilja hvernig slíkt á að líta út. Step up your game, Kópavogsbær!“ segir Ásdís Ómarsdóttir.

Myndirnar segja sína sönnu sögu

Erlendur S. Þorsteinsson vildi ekki trúa því að þetta væri eins óspennandi og myndirnar gefa til kynna og fór á staðinn til að kynna sér málið.

„En þessar myndir lýsa þessu mjög vel; þetta eru marflatir malarstígar og á ekkert skylt við fjallahjólreiðar. Það er ekki hægt að setja myndir sem ég tók eða track eða hæðarprófíl hérna í athugasemd, en þið getið skoðað:

Helgi Fannar Vilhjálmsson er hins vegar „jákvæður“, fátt sé svo með öllu illt að ekki boði nokkuð gott. Í þessu samhengi.

„Svona svona, anda með nefinu. Vitiði til…. innan skamms verður þetta orðið eins og hinar göturnar í Kópavogi. Allt í hólum og hæðum, mishallandi með þvottabrettum og holum. Ég þekki mitt heimafólk“.

Ekki liggur fyrir hversu mikið þessi framkvæmd kostaði en í athugasemdum er nefnt að upphæðin hafi verið átta milljónir en uppá það hljóðaði áætlunin í Okkar Kópavogur. Með fyrirvara um að ekki hafi verið farið fram úr fjárhagsáætlun við þetta verkefni.