Standa í erfiðum björgunaraðgerðum í Jökultungum

Vésteinn Örn Pétursson skrifar 18. júlí 2021 17:31

Aðstæður til björgunaraðgerða eru ekki góðar. Vísir/Vilhelm

Björgunarsveitir frá Hellu og Hvolsvelli voru kallaðar út í dag, auk hálendisvaktar björgunarsveita, vegna konu sem talin er fótbrotin efst í Jökultungum, milli Álftavatns og Hrafntinnuskers á gönguleiðinni Laugavegi.

Í tilkynningu frá Landsbjörg segir að hægt gangi að koma konunni að bíl, enda Jökultungur snarbrött brekka sem að öllu jöfnu þurfi að ganga mjög rólega niður.

Í samtali við fréttastofu segir Jónas Guðmundsson, verkefnastjóri slysavarna, að þurft hafi að setja upp svokallað fjallabjörgunarkerfi, þar sem aðstæður séu afar erfiðar, og raunar andstyggilegar. Í slíku kerfi felst að settar eru upp línur og annar búnaður svo hægt sé að koma konunni niður á börum, enda nánast ógerningur að bera þær niður jafn bratta brekku.

Í tilkynningu kemur fram að ætla megi að konan verði ekki komin niður að björgunarsveitarbíl fyrr en í fyrsta lagi um klukkan hálf sjö í kvöld, þó aðgerðir geti tekið lengri tíma.

Björgunarsveitir Rangárþing ytra

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.