Fótbolti

Diljá á skotskónum annan leikinn í röð

Valur Páll Eiríksson skrifar
Diljá Ýr skoraði annan leikinn í röð.
Diljá Ýr skoraði annan leikinn í röð. Göteborgs Posten/Vísir

Diljá Ýr Zomers var á meðal markaskorara í 3-0 sigri Häcken á Linköping í sænsku úrvalsdeildinni í fótbolta í kvöld. Þrjú Íslendingalið voru í eldlínunni í kvöld.

12. umferð sænsku deildarinnar hófst í kvöld með þremur leikjum. Diljá Ýr Zomers var í byrjunarliði Häcken annan leikinn í röð, þar sem hún spilaði allan leikinn í 3-0 útisigri á Linköping.

Diljá Ýr skoraði annað mark Häcken í leiknum á 71. mínútu en markalaust var allt fram á 67. mínútu leiksins. Diljá var að skora annan leikinn í röð og hefur skorað fjögur mörk í síðustu sex leikjum með liðinu.

Häcken er með 26 stig í öðru sæti deildarinnar, þremur stigum á eftir toppliði Rosengård, liði Glódísar Perlu Viggósdóttur, sem mætir Växjö á morgun.

Í þriðja sæti deildarinnar er Kristianstad, þjálfað af Elísabetu Gunnarsdóttur, sem gerði markalaust jafntefli við Vittsjö á útivelli í kvöld. Sif Atladóttir og Sveindís Jane Jónsdóttir spiluðu allan leikinn hjá Kristianstad.

Hallbera Gísladóttir spilaði þá allan leikinn fyrir lánlaust lið AIK sem tapaði sínum fjórða leik í röð, 1-0 fyrir Eskiltuna. AIK er í ellefta og næst neðsta sæti deildarinnar með níu stig eftir tólf leiki.

Sænska úrvalsdeildin er á Stöð 2 Sport en upplýsingar um útsendingar má finna hér. Sænski boltinn er hluti af Stöð 2 Sport Erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.