Innlent

Sagðist hafa ekið á staurinn því hann var í símanum

Hólmfríður Gísladóttir skrifar
Vísir/Vilhelm

Nokkur erill var hjá lögreglunni á höfuðborgarsvæðinu í gærkvöldi og nótt og tengdust mörg útkallanna einstaklingum í annarlegu ástandi. Alls voru 93 mál skráð frá kl. 17 til 5 í nótt.

Við upphaf vaktarinnar var tilkynnt um að bifreið hefði verið ekið á ljósastaur í miðbænum og að bifreiðinni hefði síðan verið ekið á brott. Lögreglumenn náðu í skottið á ökumanninum skömmu síðar og reyndist hann í annarlegu ástandi.

Gaf hann þá skýringu að hann hefði ekið á ljósastaurinn þar sem hann var upptekinn í símanum. Viðkomandi var handtekinn og vistaður í fangageymslu.

Um kl. 1 í nótt urðu lögreglumenn vitni að því þegar ökumaður ók á umferðarskilti. Þegar þeir hugðust ræða við hann reyndi hann að komast undan og ók við það á kyrrstæða bifreið. Lögregla veitti ökumanninum eftirför um póstnúmer 104, 103 og 200 og var handtekinn í kjölfarið. Hann er grunaður um akstur undir áhrifum fíkniefna.

Í umdæminu Hafnarfjörður, Garðabær og Álftanes var tilkynnt um slagsmál við verslun og þjófnað úr matvöruverslun. Þá var einstaklingur í annarlegu ástandi handtekinn fyrir hótanir í umdæminu sem nær yfir Kópavog og Breiðholt og vistaður í fangaklefa.

Annars staðar hafði lögregla afskipti af fullorðnum manni sem var að spreyja málningu á strætóbiðstöð. Var honum tilkynnt að hann yrði kærður fyrir eignaspjöll.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.