Hlutfall minnihlutahópa meðal starfsmanna drottningar 8,5 prósent

Hólmfríður Gísladóttir skrifar 24. júní 2021 12:28

Langt fram á síðustu öld var minnihlutahópum meinað að sinna skrifstofustörfum á vegum krúnunnar. epa/Neil Hall

Breska krúnan hefur í fyrsta sinn upplýst um hlutfall minnihlutahópa sem starfa fyrir konungsfjölskylduna. Hlutfallið er 8,5 prósent en stefnt er að því að bæta það og ná 10 prósentum fyrir árslok 2022.

Samkvæmt manntalinu 2011 tilheyrðu 14 prósent íbúa England og Wales minnihlutahópum, það er voru ekki hvít, en í Skotlandi er hlutfallið 4 prósent. Í Lundúnum er hlutfallið 40 prósent.

Ástæðu þess að upplýsingarnar um hlutfall minnihluta meðal starfsmanna krúnunnar eru gerðar opinberar núna má eflaust meðal annars rekja til viðtals hertogahjónanna af Sussex við spjallþáttastjórnandann Opruh Winfrey.

Í viðtalinu sögðu þau að ónefndir aðilar innan fjölskyldunnar hefðu velt fyrir sér litarhafti ófædds sonar hjónanna en í kjölfarið barst fjölmiðlum tilkynning frá Buckingham-höll að ásakanirnar væru teknar alvarlega og yrðu skoðaðar.

Talsmaður hallarinnar hefur sagt að enn vanti nokkuð upp á að „fyrirtækið“ uppfylli eigin kröfur um fjölbreytileika. Hins vegar standi til að bæta um betur og héðan í frá verði tölfræðin birt árlega.

Þess má geta að fyrr í þessum mánuði greindi Guardian frá því að fram á 7. áratug síðustu aldar hefðu minnihlutahópar verið útilokaðir frá því að sinna skrifstofustörfum á vegum krúnunnar.

Bretland Kóngafólk

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.