Innlent

Skrýtið tíst frá Al­þingi vekur lukku

Óttar Kolbeinsson Proppé skrifar
alþingitweetar

Tíst frá opinberum aðgangi Alþingis á Twitter hefur vakið talsverða lukku meðal almennings í dag.

Aðgangurinn hefur hingað til aðallega tíst um dagskrár þingfunda, þingskjöl og samþykkt lög. Hann hefur ekki verið notaður frá því að þingið lauk störfum og fór í sumarfrí, þangað til í dag.

Tístið í dag var því heldur óvenjulegt: „prufa“ voru skilaboðin sem komu frá Alþingi í dag.

Óhætt er að fullyrða að tístið er það langvinsælasta sem Alþingi hefur sent frá sér en vanalega vekja deilingar aðgangsins á opinberum upplýsingum ekki mikil viðbrögð.

Þegar þetta er skrifað hafa hátt í sex hundruð manns brugðist við tístinu, sem er ansi mikið ekki síst vegna þess að fylgjendur Alþingis á Twitter eru ekki nema 105.

En hvað er Alþingi að „prufa“? Hingað til virðist aðgangur Alþingis á samfélagsmiðlinum hafa virkað vel en ef markmið prufunnar hefur verið að ganga úr skugga um að hann gæti enn tíst eftir níu daga hlé hefur prufan farið vel.

Vísir náði ekki í Rögnu Árnadóttur, skrifstofustjóra Alþingis, til að fá skýringar á tístinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×