Nýútnefndur mikilvægasti leikmaður NBA-deildarinnar, Nikola Jokic, og félagar hans féllu í skuggann af hinum 36 ára gamla Chris Paul og félögum í Phoenix sem fóru hreinlega á kostum. Phoenix var með forystuna frá fyrstu mínútu og komst í 2-0 í einvígi sem útlit er fyrir að verði mjög stutt.

Svipmyndir úr leiknum og viðtal við Paul má sjá í NBA dagsins hér að neðan.

Fyrr í þessum mánuði bárust fregnir af því í Bleacher Report að Paul ætli að hafna boði um að framlengja samning sinn við Phoenix, sem myndi færa honum 44,4 milljónir Bandaríkjadala eða jafnvirði 5,3 milljarða króna. 

Samkvæmt fréttinni vill Paul frekar vera laus og liðugur og geta þá fengið samning til nokkurra ára annars staðar, og sá möguleiki nefndur að hann semji til þriggja ára og fái 100 milljónir dala fyrir.

Paul skoraði 17 stig í nótt en gaf líka 15 stoðsendingar og það án þess að tapa boltanum einu sinni í leiknum. Devin Booker var einnig með tvöfalda tvennu, eða 18 stig og 10 fráköst.

Paul, eða CP3 eins og hann er kallaður, var einnig með tvöfalda tvennu í fyrsta leik einvígisins þar sem hann skoraði 21 stig og átti 11 stoðsendingar.

Paul er þó samkvæmt ESPN síður en svo að missa sig í gleðinni enda það verk að slá út Denver aðeins hálfnað. Hann mun strax í búningsklefanum eftir leikinn í nótt hafa reynt að fá liðsfélaga sína til að einbeita sér strax að leiknum í Denver, sem fram fer annað kvöld, og rifjað upp þegar hann var 2-0 yfir í einvígi með New Orleans gegn San Antonio Spurs árið 2008, sem endaði með sigri Spurs.