Fótbolti

Sil­ke­borg komið með annan fótinn upp í úr­vals­deildina eftir sigur í Ís­lendinga­slagnum

Runólfur Trausti Þórhallsson skrifar
Patrik Sigurður hefur verið frábær í liði Silkeborg á tímabilinu.
Patrik Sigurður hefur verið frábær í liði Silkeborg á tímabilinu. Silkeborg

Silkeborg lagði Esbjerg 2-0 í Íslendingaslag dönsku B-deildarinnar í knattspyrnu. Sigurinn þýðir að Silkeborg er svo gott sem komið upp um deild á meðan möguleikar Esbjerg eru í raun orðnir að engu.

Eftir markalausan fyrri hálfleik skoruðu heimamenn í Silkeborg tvö mörk um miðbik síðari hálfleiks og tryggðu sér 2-0 sigur. Skömmu áður en fyrra markið kom fékk Rodolph Austin sitt annað gula spjald í liði gestanna og þar með rautt.

Það nýttu heimamenn sér og unnu eins og áður sagði 2-0 sigur.

Patrik Sigurður Gunnarsson var á sínum stað í marki Silkeborg og hélt enn á ný marki sínu hreinu. Hann er að eiga ótrúlegt tímabil en hann var á láni hjá Viborg fyrri hluta þess og Silkeborg síðari hlutann. Bæði lið stefna hraðbyr upp í dönsku úrvalsdeildina og Patrik Sigurður varla tapað leik né fengið á sig á mark.

Kjartan Henry Finnbogason var í byrjunarliði Esbjerg en náði ekki að setja mark sitt á leikinn. Andri Rúnar Bjarnason sat allan tímann á varamannabekk liðsins en Ólafur Kristjánsson er sem fyrr þjálfari þess. Þá var Stefán Teitur Þórðarson fjarri góðu gamni hjá Silkeborg.

Sigur Silkeborg þýðir að liðið er nú í 1. sæti toppriðils dönsku B-deildarinnar. Þar á eftir kemur Viborg með leik til góða sem þýðir að það getur náð toppsætinu að nýju og svo Esbjerg, tíu stigum á eftir Silkeborg.

Aðeins eru fjórir leikir eftir og tólf stig í pottinum. Það virðist því nær öruggt að Silkeborg og Viborg leiki í dönsku úrvalsdeildinni á næstu leiktíð.




Fleiri fréttir

Sjá meira


×