Um 250 þúsund manns skráðu sig til leiks samkvæmt upplýsingum frá 66°Norður. Á Strava skrá notendur alla hreyfingu, hvort sem það er ganga, hlaup, hjólreiðar, skíði eða annað. Vinningshafinn er frá Þýskalandi og fær hann að bjóða einum með sér í ferðina til Íslands.
„Það var gríðarlega góð þátttaka í leiknum og greinilega mikill áhugi alþjóðlega að heimsækja Ísland. Hreyfiátakið beindist til fólks á lykil markaðssvæðum 66°Norður erlendis, í Bandaríkjunum, Bretlandi, Norðurlöndunum og Þýskalandi,“ segir Fannar Páll Aðalsteinsson, markaðsstjóri 66°Norður.
Í kjölfar Covid hefur áhugi fólks aukist gríðarlega á hreyfingu utandyra, hvort sem það eru hjólreiðar, hlaup eða göngur og eru ný skráningar- og þátttökumet í flest öllum hlaupum og mótaröðum í sumar og framboðið sjaldan verið meira.
„Það er frábært að sjá hvað er mikil þróun í móta- og viðburðahaldi sem tengist útivist og við horfum á það sem okkar hlutverk að taka þátt í að styðja við slíkt og vinnum með þó nokkrum hlaupum og viðburðum eins og til dæmis Laugavegshlaupinu, Esju Ultra, Hengil Ultra, hlaupahátíð Vestfjarða, nýju hlaupi á Fimmvörðuhálsi, svo eitthvað sé nefnt.“
Íslenski fataframleiðandinn hefur einnig verið í samstarfi við hlauparana Elísabetu Margeirsdóttur og Þorberg Inga Jónsson. Elísabet er fremsta fjallahlaupakona landsins. Hún náði þeim magnaða árangri að klára fyrst kvenna, fjögurhundruð kílómetra utanvegahlaup í asísku Gobi eyðimörkinni á undir hundrað klukkustundum. Hún hljóp einnig Laugaveginn fyrst árið 2009. Þorbergur Ingi er fremsti fjallahlaupari landsins, en hann á fimm bestu hlaupatímana í vinsælasta utanvegarhlaupi Íslands, Laugarvegshlaupinu.
„Þessi þróun undanfarin ár hefur vissulega haft áhrif á vöruþróun okkar og nú nýlega kynntum við Kársnes og Straumnes línuna okkar sem samanstendur meðal annars af jakka úr Gore Infinium efni sem er frábær í hlaup og almenna hreyfingu en um leið tekur tillit til íslenskra veðuraðstæðna.“ segir Fannar.
