Lífið

„Áhrifavaldar koma ekki með neitt nýtt á borðið“

Sylvía Rut Sigfúsdóttir skrifar
Arnór Steinn Ívarsson ræddi samfélagsmiðla og áhrifavalda í nýjasta þættinum af hlaðvarpinu Gagnaverið.
Arnór Steinn Ívarsson ræddi samfélagsmiðla og áhrifavalda í nýjasta þættinum af hlaðvarpinu Gagnaverið. Vísir

Hlaðvarpið Gagnaverið ætlar að birta þrjá ítarlega þætti um samfélagsmiðla og áhrif þeirra, allt frá Myspace yfir í Onlyfans. Í fyrsta hlutanum var rætt við Arnór Stein Ívarsson félagsfræðing og þáttastjórnanda hjá Tölvuleikjaspjallinu.

Arnór segir að það sé erfitt að meta hvort kostirnir við samfélagsmiðla séu fleiri en gallarnir, eða hvort það sé öfugt. Talið barst meðal annars að áhrifavöldum.

Áhrifavaldar hafa verið til lengi, en það var ekki fyrr en 2015 sem fyrirtæki fóru að taka að sér að finna spons fyrir áhrifavalda og að tengja saman áhrifavalda og fyrirtæki vegna auglýsinga.

„Ég er persónulega á því að áhrifavaldar koma ekki með neitt nýtt á borðið. 100 prósent. Jújú áhrifavaldar hafa, eftir að þau urðu fræg, orðið hluti af umræðu og geta vakið athygli á einhverjum málefnum en ég vil samt meina að það sé ekki nóg að vera frægur fyrir ekki neitt og koma svo og segja já en ég hafði áhrif á þessa umræðu eða vakti athygli á málum í Afríku.“

Gagnaverið er hlaðvarp hér á Vísi.Vísir/Hjalti

Brjálaðist yfir auglýsingu Kendall Jenner

Hann notar umdeilda Pepsi auglýsingu Kendall Jenner sem dæmi um þetta.

„Þessi auglýsing, réttilega féll ekki í kramið hjá neinum nema einhverjum tólf ára gömlum Kendall-fans.“

Arnór segir að auglýsingin hafi átt að sýna að Kendall væri ekki gagnslaus heldur gæti haft áhrif.

„Við erum í híber kapítalísku samfélagi þar sem fyrirtæki líta svo stórt á sig að það þarf bara fallega stelpu og vöru til að allir verði sáttir. Líka bara hvað þetta dró úr öllum byltingum, alvarleikanum og mikilvægi byltinga. Þetta var risastór fokk-jú putti á alla sem hafa dáið í vopnuðum bardögum fyrir frelsi og lýðræði,“ segir Arnór og heldur svo áfram.

„Ég hélt að ég væri búinn að jafna mig á þessu en ég er það greinilega ekki. Ég gjörsamlega brjálaðist þegar ég sá þetta.“

Kendall gaf seinna út afsökunarbeiðni vegna auglýsingarinnar, sem sjá má hér fyrir neðan.

Drullusama um frían brunch og hótelgistingar

Arnór segir að fyrirtækið hafi ætlað að sýna með því að nota eina frægustu ungu konu heims á þeim tíma, hvað þau eru gild í umræðunni og hvað áhrifavaldar séu mikilvægir.

„Raunin er sú, nei og nei. Ég ætla bara að halda því fullkomlega fram að áhrifavaldar koma ekki með neitt nýtt í umræðuna, bara til samfélagsins. 

Okkur er drullusama þó að þú farir á Þrastarlund og fáir þér brunch frítt, don’t care. Okkur er drullusama þó þú farir á hótel og fáir þér frítt kampavínsglas, don’t care. Gerðu þetta, en við hin þurfum að borga fyrir það. 

Bara af því að þú ert aðeins meira aðlaðandi en allir hinir, eða ekki einu sinni endilega það. Bara af því að þú ert með einhvers konar kapítal til að gera þetta.“

Þrastalundur er vinsæll viðkomustaður ferðamanna og áhrifavalda á Suðurlandi.

Hann segir að auðvitað séu þó undantekningar og að það sé alveg til fólk sem sé á fullu að búa til efni og eigi þetta skilið.

„En það er bara að stór hluti af þessu liði er bara ekki að gera rassgat og er að fá fullt af dóti frítt fyrir. Þau eru ekki að gera neitt.“

Hvað er þetta OnlyFans og er það skref í rétta átt? Hvað varð um MySpace? Hvað er málið með áhrifavalda í dag? Hvaða áhrif hafa samfélagsmiðlar á samfélagi? Eru samfélagsmiðlar af hinu góða? Þessum spurningum og fleirum er svarað í þættinum hér fyrir neðan.

Gagnaverið er nýtt hlaðvarp hér á Vísi og er fyrir alla sem hafa áhuga á að læra meira um tæknina sem er alls staðar í kringum okkur. Meðal annars verður fjallað um rafíþróttir, 5G, sjálfkeyrandi bíla, raddstýringu tækja og svo verður líka farið yfir það hvernig gervigreind virkar. Umsjónarmenn þáttanna eru Arnar Kjartansson, María Rós Kaldalóns og Steingrímur Þór Ágústsson,


Tengdar fréttir

„Það er ekkert endilega erfitt fyrir tölvur að læra íslensku“

Í nýjasta þætti af hlaðvarpinu Gagnaverið er fjallað um raddstýringu tækja, eins og Siri og Google Assistant. Í þættinum ræða þáttastjórnendurnir Arnar Kjartansson og María Rós Kaldalóns meðal annars við Jóhönnu Vigdísdi Guðmundsdóttur. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.