Fótbolti

Leikur sem skiptir sköpum fyrir okkar stelpur er 600 kílómetrum frá þeim

Sindri Sverrisson skrifar
Andrea Rán Hauksdóttir, Berglind Rós Ágústsdóttir, Elísa Viðarsdóttir og Karitas Tómasdóttir á æfingu landsliðsins á Ítalíu.
Andrea Rán Hauksdóttir, Berglind Rós Ágústsdóttir, Elísa Viðarsdóttir og Karitas Tómasdóttir á æfingu landsliðsins á Ítalíu. @footballiceland

Þó að íslenska kvennalandsliðið í fótbolta mæti Ítalíu í vináttulandsleik í Flórens í dag má segja að annar leikur, í öðru landi, skipti enn meira máli fyrir liðið.

Í dag ræðst hvaða þrjú lið verða þau síðustu til að tryggja sig inn á Evrópumótið sem fram fer í Englandi sumarið 2022. Ísland og Ítalía, sem og Austurríki, tryggðu sig inn á mótið sem stigahæstu liðin sem lentu í 2. sæti síns riðils í undankeppninni.

Hin sex liðin sem lentu í 2. sæti fóru í umspil og ráðast úrslitin í umspilinu í dag. Norður-Írland er 2-1 yfir fyrir seinni leik sinn við Úkraínu sem fram fer í Belfast. Rússland vann sömuleiðis útisigur, 1-0, í fyrri leik sínum við Portúgal. Staðan í einvígi Tékklands og Sviss er hins vegar jöfn, 1-1, en liðin mætast í kvöld í 600 kílómetra fjarlægð frá leikstað Íslands, nánar tiltekið í bænum Thun í Sviss.

Ræður því hvort Ísland fer í þriðja eða fjórða flokk

Það er einmitt leikur Tékklands og Sviss sem skiptir sköpum fyrir íslenska landsliðið. Málið er einfalt. Ef að Sviss vinnur einvígið verður Ísland í neðsta styrkleikaflokki þegar dregið verður í riðla á EM.

Ef að Tékkland vinnur þá kemst Ísland í þriðja styrkleikaflokk, sleppur við að mæta Danmörku, Belgíu eða Austurríki, og fær eitt af lökustu liðum mótsins með sér í riðil.

Augu íslenskra stuðningsmanna ættu því ekki aðeins að vera á leik Ítalíu og Íslands, sem sýndur verður beint á Stöð 2 Sport kl. 14 í dag, heldur einnig á leik Sviss og Tékklands sem hefst kl. 18.

Liðin sem leika á EM

Flokkur 1: Holland, Þýskaland, England, Frakkland.

Flokkur 2: Svíþjóð, Spánn, Noregur, Ítalía.

Flokkur 3: Danmörk, Belgía, Austurríki, Sviss/Ísland.

Flokkur 4: Finnland, Tékkland/Ísland, Úkraína/N-Írland, Rússland/Portúgal.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.