Innlent

Mið­flokkurinn í vanda á lands­byggðinni en Við­reisn og Píratar sækja á

Sunna Kristín Hilmarsdóttir skrifar
Karl Gauti Hjaltason náði kjöri á þing fyrir Flokk fólksins en gekk til liðs við Miðflokkinn í kjölfar Klaustursmálsins. Hér er hann með þeim Bergþóri Ólasyni og Sigmundi Davíð Gunnlaugssyni á þingflokksfundi.
Karl Gauti Hjaltason náði kjöri á þing fyrir Flokk fólksins en gekk til liðs við Miðflokkinn í kjölfar Klaustursmálsins. Hér er hann með þeim Bergþóri Ólasyni og Sigmundi Davíð Gunnlaugssyni á þingflokksfundi. Vísir/Vilhelm

Færa má rök fyrir því að Miðflokkurinn sé í vanda á landsbyggðinni ef litið er á niðurstöður nýrrar könnunar Maskínu fyrir fréttastofu Stöðvar 2, Vísis og Bylgjunnar um fylgi flokkanna í Norðvestur,- Norðaustur- og Suðurkjördæmi.

Fylgi flokksins mælist töluvert minna í könnuninni en í alþingiskosningunum 2017 á meðan Viðreisn og Píratar sækja á og bæta við sig fylgi sé miðað við niðurstöður kosninganna fyrir fjórum árum.

Þannig myndu Píratar ná inn þingmanni í öllum landsbyggðarkjördæmunum en flokkurinn er í dag bara með þingmann í Suðurkjördæmi af þessum þremur kjördæmum.

Viðreisn er ekki með neinn landsbyggðarþingmann nú en myndi ná inn manni í Suðurkjördæmi samkvæmt könnun Maskínu og berjast um þingsæti við Miðflokkinn í Norðvesturkjördæmi. Flokkurinn myndi hins vegar ekki ná inn manni í Norðausturkjördæmi.

Miðflokkurinn gæti misst báða þingmenn sína í Norðvesturkjördæmi miðað við niðurstöður könnunarinnar. 

Píratar myndu ná inn manni þar á kostnað Miðflokksins og spurningin er hvort Bergþór nái aftur inn á þing, fari hann fram á ný sem oddviti, eða hvort Guðmundur Gunnarsson, sem lýst hefur vilja til að leiða lista Viðreisnar í kjördæminu, velti honum úr sessi. Sigurður Páll Jónsson myndi missa sæti sitt fyrir Miðflokkinn.

Guðmundur Gunnarsson, fyrrverandi bæjarstjóri á Ísafirði, vill leiða lista Viðreisnar í Norðvesturkjördæmi. Miðað við könnun Maskínu myndi hann berjast við Miðflokkinn um þingsæti í kjördæminu.Vísir/Vilhelm

Miðflokkurinn myndi missa einn í Norðaustur

Miðflokkurinn fékk 14,2 prósent atkvæða í Norðvesturkjördæmi í kosningunum 2017. Hann mælist nú með 8,2 prósenta fylgi í kjördæminu.

Viðreisn fékk 2,4 prósent atkvæða í kjördæminu 2017 en mælist í könnuninni með 8,2 prósenta fylgi. Píratar fengu 5,5 prósent í Norðvestur 2017 og mælast nú með 8,6 prósenta fylgi.

Miðflokkurinn hlaut mjög góða kosningu í Norðausturkjördæmi 2017 og var þriðji stærsti flokkurinn með 18,6 prósent. Flokkurinn hefur hins vegar misst töluvert af fylgi sínu í þessu vígi formanns flokksins miðað við könnun Maskínu þar sem hann mælist með 11,8 prósent.

Sigmundur Davíð Gunnlaugsson, formaður flokksins, myndi halda sæti sínu í Norðausturkjördæmi miðað við könnun Maskínu en Anna Kolbrún Árnadóttir myndi missa sæti sitt.

Miðflokkurinn fékk 14,2 prósent atkvæða í Suðurkjördæmi í kosningunum 2017 og einn mann en mælist nú með 10,7 prósenta fylgi.

Birgir Þórarinsson, oddviti Miðflokksins í Suðurkjördæmi, héldi þannig sæti sínu en töluvert þarf að koma til svo að Karl Gauti Hjaltason, sem náði kjöri fyrir Flokk fólksins í kjördæminu en gekk svo til liðs við Miðflokkinn í kjölfar Klaustursmálsins, næði inn.

Í kosningunum 2017 hlaut Viðreisn aðeins 2,1 prósent atkvæða í Norðausturkjördæmi. Flokkurinn mælist nú með sex prósenta fylgi. Píratar fengu 5,5 prósent atkvæða í kjördæminu 2017 og mælast nú með 6,2 prósenta fylgi.

Viðreisn fékk 3,1 prósent atkvæða í Suðurkjördæmi 2017 en mælist með 10,6 prósenta fylgi í könnun Maskínu. Píratar fengu sjö prósent atkvæða í Suðurkjördæmi 2017 og mælast nú með 10,1 prósenta fylgi.

Inga Sæland er formaður Flokks fólksins. Hún er þingmaður Reykjavíkurkjördæmis suður.Vísir/Vilhelm

Flokkur fólksins og Sósíalistar ná ekki inn

Ef horft er til hinna flokkanna þá ná hvorki Flokkur fólksins né Sósíalistaflokkurinn inn mönnum í landsbyggðarkjördæmunum miðað við könnun Maskínu. Flokkur fólksins mælist með sex prósenta fylgi í Suðurkjördæmi, 4,6 prósent í Norðvestur og 4,3 prósent í Norðaustur.

Sósíalistar mælast með 4,4 prósent í Suðurkjördæmi, 4,4 prósent einnig í Norðvestur og 5,7 prósenta fylgi í Norðausturkjördæmi.

Sjálfstæðisflokkurinn, Framsókn, Samfylkingin og Vinstri græn halda aftur á móti öllum sínum þingsætum í landsbyggðarkjördæmunum þremur.

Sjálfstæðisflokkurinn er stærsti flokkurinn bæði í Suður- og Norðvesturkjördæmi með 23,3prósenta fylgi annars vegar og 22,5 prósenta fylgi hins vegar.

Framsóknarflokkurinn er með 14,1 prósenta fylgi í Suðurkjördæmi og 17,2 prósent í Norðvestur. Vinstri græn mælast með 9,6 prósenta fylgi í Suðurkjördæmi og 13,5 prósent í Norðvesturkjördæmi. Samfylkingin mælist svo með 11,3 prósenta fylgi í Suður og 10,7 prósent í Norðvestur.

Samfylkingin og Vinstri græn mælast síðan stærst og jafnstór í Norðausturkjördæmi með 17,4 prósenta fylgi. Sjálfstæðisflokkurinn fylgir fast á hæla þeirra með 16,5 prósenta fylgi. Þá kemur Framsóknarflokkurinn með 14,7 prósent.

Einhver endurnýjun í hópi landsbyggðarþingmanna

Ljóst er að einhver endurnýjun verður í hópi landsbyggðarþingmanna þessara fjögurra flokka. Þannig gefur Ari Trausti Guðmundsson, oddviti VG í Suðurkjördæmi, ekki áfram kost á sér.

Að minnsta kosti fjögur hafa lýst því yfir að þau sækist eftir því sæti og má búast við hörðum slag eins og Vísir fjallaði um fyrr í vikunni.

Þá leiðir Óli Halldórsson lista VG í Norðaustur í stað Steingríms J. Sigfússonar sem sest í helgan stein í haust eftir tæp fjörutíu ár á þingi.

Ásmundur Einar Daðason, félagsmálaráðherra og oddviti Framsóknarflokksins í Norðvesturkjördæmi, hyggst síðan bjóða sig fram í Reykjavík norður í haust svo þar með losnar oddvitasæti.

Halla Signý Kristjánsdóttir, þingmaður Framsóknar sem skipaði 2. sætið í Norðvestur 2017 sækist eftir 1. sætinu nú. Það gerir einnig Stefán Vagn Stefánsson, yfirlögregluþjónn hjá lögreglunni á Norðurlandi vestra, auk Guðveigar Lindar Eyglóardóttur, oddvitaflokksins í Borgarbyggð.

Gögnin á bak við kjördæmin þrjú koma úr þremur mælingum sem Maskína gerði fyrir fréttastofu; í desember 2020, í janúar 2021 og í febrúar 2021.

Fjöldi svarenda í Suðurkjördæmi voru 759, fjöldi svarenda í Norðvesturkjördæmi, sem jafnframt er fámennasta kjördæmi landsins, voru 394, og fjöldi svarenda í Norðausturkjördæmi voru 568.

Þá má geta þess að listar flokkanna í þessum þremur kjördæmum fyrir þingkosningarnar í haust liggja ekki að öllu leyti fyrir heldur er miðað við þær upplýsingar sem hafa komið fram um listana og svo þingmenn flokkanna í dag og listana eins og og þeir voru fyrir fjórum árum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×