Innlent

Lent á Íslandi eftir nærri tveggja ára kyrrsetningu

Kristján Már Unnarsson skrifar
Boeing 737 Max-þotan TF-ICN lent á Keflavíkurflugvelli í dag. Hún ber heitið Mývatn.
Boeing 737 Max-þotan TF-ICN lent á Keflavíkurflugvelli í dag. Hún ber heitið Mývatn. KMU

Icelandair endurheimti í dag tvær fyrstu Boeing 737 Max-þotur sínar eftir nærri tveggja ára kyrrsetningu og lentu þær í Keflavík með stuttu millibili upp úr hádegi. Flugstjóri fyrri vélarinnar segir endurkomu þeirra gefa von um nýja og betri tíma fyrir félagið.

Flugvélin Mývatn að snerta austur-vestur flugbraut Keflavíkurflugvallar eftir fjögurra stunda ferjuflug frá Spáni.Einar Árnason

Fyrri vélin, TF-ICN, sem kallast Mývatn, lenti í Keflavík laust upp úr klukkan eitt eftir fjögurra tíma flug frá Spáni en þar hafa fimm af sex Max þotum Icelandair verið geymdar undanfarna sextán mánuði. Henni var síðan ekið að flugskýlum félagsins, eins og sjá mátti í fréttum Stöðvar 2.

Flugstjórarnir Haraldur Baldursson og Kári Kárason segjast ekki hafa verið stressaðir fyrir fyrsta flugtakið. Þeir hafi fyrst og fremst verið glaðir.

Flugstjórarnir Haraldur Baldursson og Kári Kárason fara yfir tékklistann að flugi loknu.Einar Árnason

„Það er náttúrlega búið að uppfæra forritunina í þessum hluta flugstjórnarkerfisins sem voru vandræði með. Við erum búnir að prófa þetta í flughermum og búnir að æfa okkur mikið á þessu öllu saman. Og við vorum bara mjög glaðir að komast í loftið á þessum flugvélum,“ segir Haraldur.

Heimflugið segir hann hafa gengið eins og í sögu.

„Vélin reyndist vera bara í fullkomnu standi. Við höfum ekki fundið eitt einasta smáatriði sem við gætum sett út á.“

Seinni vélinni, TF-ICO, Búlandstindi, ekið að flugskýlum Icelandair.Einar Árnason

Um fimmtán mínútum síðar lenti seinni vélin, TF-ICO, Búlandstindur, en henni flugu þeir Þórarinn Hjálmarsson og Eiríkur Haraldsson. Henni var einnig ekið að viðhaldsstöð Icelandair þar sem vélanna bíða ítarlegri skoðanir. Haraldur segir vonir bundnar við komu þeirra enda séu þær hagkvæmar og hljóðlátar.

„Og auðvitað fyrir okkur hjá Icelandair, þá gefur þetta von um nýja og betri tíma,“ segir flugstjórinn Haraldur.

Kvikmyndatökumaður Stöðvar 2, Einar Árnason, myndar Mývatn við flugskýli Icelandair í dag.kmu

Icelandair eru þegar búið að fá afhentar sex Max-þotur. Þrjár til viðbótar bíða tilbúnar hjá Boeing-verksmiðjunum í Seattle og bætast í flota Icelandair síðar á árinu. Loks koma aðrar þrjár á næsta ári og verða þær þá orðnar tólf talsins.

Icelandair stefnir að því að taka þær í notkun á vormánuðum. Hversu hratt þær komast svo í notkun, - það eru sennilega kórónuveiran og bólusetningar sem ráða mestu um það.

Hér má sjá frétt Stöðvar 2.


Tengdar fréttir

Flugmenn Icelandair búa sig undir að fljúga Maxinum á ný

Flugmenn Icelandair gangast núna undir endurþjálfun á Boeing 737 Max-þotur eftir að Flugöryggisstofnun Evrópu aflétti nærri tveggja ára flugbanni í síðustu viku. Félagið hyggst byrja að ferja þoturnar aftur til Íslands í kringum næstu helgi.

Boeing 737 Max fá græna ljósið í Evrópu

Flugöryggisstofnun Evrópu hefur gefið græna ljósið á að Boeing 737 Max flugvélarnar geti flogið um loftin blá í Evrópu. Þar með er 22 mánaða banni á flugvélunum lokið í kjölfar tveggja flugslysa sem kostuðu 346 manns lífið.

Maxarnir náðu án vandræða til vetrarstöðvanna á Spáni

Tveimur Boeing 737 MAX-vélum Icelandair var flogið frá Íslandi í dag til vetrargeymslu á Spáni. Þetta var í fyrsta sinn frá kyrrsetningu MAX-vélanna fyrir sjö mánuðum að vélar þessarar tegundar frá Icelandair tóku á loft.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.