Innlent

„Það hefði auðvitað verið frábært ef þetta hefði gengið“

Eiður Þór Árnason skrifar
Katrín Jakobsdóttir forsætisráðherra segir að stjórnvöld hyggist halda sínu striki.
Katrín Jakobsdóttir forsætisráðherra segir að stjórnvöld hyggist halda sínu striki. Vísir/vilhelm

„Það hefði auðvitað verið frábært ef þetta hefði gengið en það lá alveg fyrir að það gæti farið allavega.“ Þetta segir Katrín Jakobsdóttir forsætisráðherra um viðbrögð sín við þeim fregnum að litlar líkur séu á því að lyfjaframleiðandinn Pfizer muni efna til fjórðu fasa rannsóknar á virkni bóluefnis fyrirtækisins hér á landi.

Vonast var til að slík rannsókn myndi tryggja stórum hluta Íslendinga bóluefni við Covid-19 með mun skjótari hætti en áður var gert ráð fyrir.

„Við höldum bara ótrauð áfram í okkar verkefni sem er annars vegar að tryggja sóttvarnir, þar sem okkur hefur auðvitað tekist vel, og síðan að halda áfram því verkefni að tryggja bóluefni fyrir alla landsmenn,“ segir Katrín í samtali við Vísi. 

Ríkisstjórnin ekki átt beina aðkomu að viðræðunum

Mikil eftirvænting var eftir niðurstöðu samningaviðræðna við Pfizer en fulltrúar fyrirtækisins funduðu síðdegis með Þórólfi Guðnasyni sóttvarnalækni, Kára Stefánssyni, forstjóra Íslenskrar erfðagreiningar, og Má Kristjánssyni, yfirlækni smitsjúkdómadeildar Landspítalans. 

Niðurstaða fundarins var sú að ekki væru nógu mörg kórónuveirutilfelli hér til að réttlæta slíka rannsókn. Þórólfur sagði skömmu eftir fundinn í dag að ekki væri enn búið að útiloka neitt en að líkurnar væru mjög litlar. Von er á formlegu svari frá Pfizer á næstu dögum. Að sögn Katrínar hafði ríkisstjórnin enga beina aðkomu að samningaviðræðunum en að ráðherrar hafi stutt sóttvarnalækni og Kára í viðræðum þeirra við fyrirtækið.

Faraldurinn sé langhlaup

„Ég hafði heyrt í þessum vísindamönnum sem voru á leiðinni á þennan fund og þeir sögðu að það gæti brugðið til beggja vona, þannig að það í sjálfu sér er bara eins og það er,“ segir Katrín.

Er þessi niðurstaða vonbrigði?

„Þessi faraldur er langhlaup en þetta breytir engu um það að við höldum bara okkar striki áfram. Við höfum sýnt mjög góðan árangur í þessu hingað til og búum núna líklega við einar minnstu sóttarnaráðstafanir í Evrópu. Svo erum við auðvitað á fullu á bólusetningun og erum þá fremur ofarlega hlutfallslega í hópi í Evrópuþjóða svo við munum bara halda áfram á sömu braut.“

Verði búið að bólusetja meirihluta þjóðarinnar um mitt ár

Þegar Katrín er beðin um að meta stöðu Íslands eftir þessa niðurstöðu segir hún að töluvert betri upplýsingar liggi nú fyrir um afhendingu bóluefna á fyrsta ársfjórðungi.  

„Ég hef nú væntingar til þess að þetta muni ganga hraðar á öðrum ársfjórðungi ef marka má áætlanir lyfjafyrirtækjanna. Þannig að ég stend við það sem ég hef áður sagt að ég tel að við verðum komin á þann stað svona um mitt ár að við verðum farin að sjá meirihluta þjóðarinnar bólusetta.“

Aðspurð um það hvort hún vilji láta reyna á það að taka upp viðræður við aðra bóluefnaframleiðendur bendir Katrín á slíkt hafi þegar verði gert. 

„Það skilaði þessum fundum sem haldnir voru með Pfizer og það er eins og fram hefur komið hverfandi líkur á því svo við verðum bara að sjá hvað setur svo í framhaldinu.“

Greint var frá því fyrir áramót að Þórólfur og Kári hafi um tíma sömuleiðis átt í óformlegum viðræðum við Moderna um framkvæmd álíka rannsóknar. Kári sagði í samtali við fréttastofu skömmu eftir fundinn í dag að hann eigi ekki von á því að taka upp þráðinn með öðrum framleiðendum. Þar myndu sömu röksemdir blasa við og hjá Pfizer, að of fá smit séu til staðar hér á landi. 

Fréttin hefur verið uppfærð.


Tengdar fréttir

Kári, Már og Þórólfur funda með Pfizer klukkan 16

Kári Stefánsson, forstjóri Íslenskrar erfðagreiningar, Már Kristjánsson, yfirlæknir smitsjúkdómadeildar Landspítalans og Þórólfur Guðnason sóttvarnalæknir funda með vísindamönnum frá lyfjafyrirtækinu Pfizer klukkan 16 í dag.

Þyrftu alltaf að reyna á hjarðónæmi burtséð frá Pfizer-rannsókn

Sóttvarnalæknir segir lyfjafyrirtækið Pfizer ekki hafa gert kröfu um að landamærin verði opnuð í nafni bóluefnarannsóknar og ekki standi til að stefna heilsu þjóðarinnar í hættu. Slakað verði þó á sóttvarnaaðgerðum á landamærunum þegar bólusetningar eru langt komnar



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.