Innlent

Sam­fé­lagið hafi því miður viður­kennt hatur­s­orð­ræðu í garð stjórn­mála­manna

Kristín Ólafsdóttir skrifar
Katrín Jakobsdóttir, forsætisráðherra, hél.
Katrín Jakobsdóttir, forsætisráðherra, hél. Vísir/vilhelm

Katrín Jakobsdóttir forsætisráðherra fordæmdi skotárás sem nýlega var gerð á heimili Dags B. Eggertssonar borgarstjóra í ræðu sinni á rafrænum flokksráðsfundi Vinstri grænna sem hófst í dag. Þá gerði hún góðan árangur Íslands í baráttunni við kórónuveiruna að umtalsefni.

„Ég fordæmi þessa árás og vona að hún verði einstakur viðburður. Ég hef heyrt í borgarstjóra vegna málsins og vonast til þess að því verði brátt lokið. En ég verð líka að segja að hún kemur ekki eins og þruma úr heiðskíru lofti,“ sagði Katrín í ræðu sinni.

„Því miður hefur samfélag okkar viðurkennt hatursorðræðu gagnvart stjórnmálum og einstökum stjórnmálamönnum og nægir að líta yfir samfélagsmiðla reglulega til að lesa um ónýta og viðurstyggilega spillta stjórnmálamenn sem eru undirlægjur, fullir af mannhatri og mannvonsku og standa jafnvel fyrir nýjum helförum. Svo ég noti nokkur þau orð sem ég hef nýlega séð höfð um sjálfa mig og aðra. Mörkin hafa færst til og það hefur áhrif. Þar með er ég ekki að biðjast undan málefnalegri umræðu þar sem fólk greinir á. Við getum verið ósammála en þurfum ekki að vera óvinir.“

Þá kvaðst Katrín vilja búa í samfélagi þar sem fólk í stjórnmálum geti gengið frjálst um götur. Þetta hefði verið aðalsmerki Íslands og þannig ætti það að vera áfram.

Gjaldfrjáls sýnataka skilað sínu

Katrín sagði árangur Íslands í að takast á við faraldur kórónuveiru hafa verið góðan.

„Samkvæmt nýlegri álitsgerð er Ísland í sjöunda sæti í heiminum þegar árangur er metinn í baráttunni við faraldurinn, í fyrsta sæti í okkar heimshluta þar sem veiran hefur annars haft mest áhrif,“ sagði Katrín. Árangurinn væri fyrst og fremst að þakka framlínustarfsfólki í heilbrigðiskerfinu og annars staðar.

„Hann náðist líka með þeirri ákvörðun að tryggja öllum gjaldfrjálsa sýnatöku þar sem fólk gat mætt samdægurs og fengið niðurstöður samdægurs. Þetta þykir okkur núna í árslok sjálfsagt en var það ekki fyrir ári og er alls ekki sjálfsagt annars staðar og er lykilatriði í árangri okkar, ásamt öflugri smitrakningu og markvissri beitingu á sóttkví og einangrun.“

Ræðu Katrínar, auk ræðu Guðmundar Inga Guðbrandssonar, umhverfisráðherra og varaformanns Vinstri grænna, má horfa á í spilaranum hér fyrir neðan.


Tengdar fréttir

Óhugnanlegt hvað árásirnar hafa vakið lítil viðbrögð

„Við tölum um íslensk stjórnmál sem ónýt og um stjórnmálamenn sem gjörspillt illmenni og þetta endar bara í ofbeldi. Það svo stutt þarna á milli. Það er ofboðslega sorglegt að við skulum vera að missa samfélagið í þessa átt. Af því að þetta var ekki svona,“ segir Kristrún Heimisdóttir lögfræðingur.

„Orðræðan er mjög harkaleg og oft hatursfull“

„Ég fordæmi þessa árás og finnst hún alvarleg, því þarna er verið að beita skotvopnum fyrir utan heimili stjórnmálamanns. Ég lít þetta alvarlegum augum,“ segir Katrín Jakobsdóttir forsætisráðherra um skotárás á bíl borgarstjóra um liðna helgi sem lögregla hefur til skoðunar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.