Innlent

Ýmis ákvæði sóttvarnalaga styrkt og skýrð nánar

Heimir Már Pétursson skrifar
Í frumvarpi heilbrigðisráðherra um breytingar á sóttvarnalögum eru ýmsar heimildir sóttvarnayfirvalda styrktar og hugtök skýrð nánar.
Í frumvarpi heilbrigðisráðherra um breytingar á sóttvarnalögum eru ýmsar heimildir sóttvarnayfirvalda styrktar og hugtök skýrð nánar. Vísir/Vilhelm

Annarri umræðu um breytingar á sóttvarnalögum lauk á Alþingi í gærkvöldi en þær fela í sér styrkingu alls konar heimilda sóttvarnayfirvalda til aðgerða í sóttvarnamálum. Varaformaður velferðarnefndar Alþingis segir brýnt að hefja þegar undirbúning að heildarendurskoðun laganna.

Heilbrigðisráðherra lagði fram ítarlegt frumvarp til breytinga á sóttvarnalögum undir lok nóvember. Velferðarnefnd skilaði áliti sínu á miðvikudag og skrifa allir níu nefndarmenn undir það, þótt fimm þeirra geri það með fyrirvara en það eru þau

Helga Vala Helgadóttir Samfylkingu, Anna Kolbrún Árnadóttir Miðflokki, Guðmundur Ingi Kristinsson Flokki fólksins, Sara Elísa Þórðardóttir Pírötum og Sigríður Á. Andersen Skálfstæðisflokki.

Allir níu nefndarmenn velferðarnefndar skrifa undir álit nefndarinnar og breytingatillögur en fimm nefndarmanna gera það með fyrirvara. Hér má sjá varaformann velferðarnefndar Ólaf Þór Gunnarsson og Helgu Völu Helgadóttur formann nefndarinnar.Vísir/Vilhelm

Frumvarpinu er ætlað að „skýra gildandi sóttvarnalög með hliðsjón af reynslu heimsfaraldurs kórónuveiru og koma í veg fyrir réttaróvissu um sóttvarnaráðstafanir stjórnvalda. Sérstaklega er horft til ákvæða sem fjalla um opinberar sóttvarnaráðstafanir og valdheimildir stjórnvalda þar að lútandi," segir í nefndaráliti.

Ólafur Þór Gunnarsson Vinstri grænum og varaformaður nefndarinnar mælti fyrir nefndarálitinu á Alþingi í gær og sagði frumvarpið fjalla um tilteknar beytingar en fæli ekki í sér þá heildarendurskoðun sem kallaði hefði verið eftir á lögunum.

„Sem fyrst vindi menn sér í þetta verkefni. Það sé ekki dregið of lengi vegna þess að það eru viss atriði þarna sem þegar blasa við að munu þurfa endurskoðunar við. Það er hægt að fara að vinna í þeim nú þegar,“ sagði Ólafur Þór.

Mikill tími nefndarmanna hafi farið í að ræða tengsl stjórnsýslulaga við sóttvarnalög.

Í frumvarpinu eru heimildir til að skylda ferðamenn í tvöfalda skimun styrktar og nánar kveðið á um starfsemi sóttvarnahúsa svo dæmdi séu tekin.Vísir/Vilhelm

„Þessi umræða er mjög mikilvæg. Einkum og sér í lagi þegar horft er til þess að sóttvarnalög á vissan hátt takamarka réttindi, vissulega tímabundið yfirleitt, sem við sem almennir borgarar lítum á sem sjálfsögð,“ sagði Ólafur Þór.

Þannig vildi Helga Vala undirstrika að fyrirmæli sóttvarnalæknis yrðu aldrei munnleg heldur ávallt skrifleg að minnsta kosti með tölvupósti eða skilaboðum í síma. Guðmundur Ingi vildi heimila strangari aðgerðir en frumvarpið kveður á um svo eitthvað sé nefnt.

Ýmis hugtök eins og smitrakning og sótthreinsun eru skilgreind nánar og tekið fram að meðalhófs verði ávallt gætt við allar aðgerðir og aldrei gengið lengra en nauðsyn beri til hverju sinni. Heimildir til skimana og annarra aðgerða á landamærum eru einnig skilgreindar nánar.

„Allt þetta er mjög mikilvægt til þess að almenningur hafi góða tilfinningu fyrir því að það sé ekki verið að ganga lengra heldur en þarf til að mæta grundvallar markmiðinu. Sem er að vernda líf og heilsu borgaranna,“ sagði Ólafur Þór Gunnarsson á Alþingi í gær.

Umræðan stóð yfir í rúmar fjórar og hálfa klukkustund og lauk upp úr klukkan sjö í gærkvöldi.


Tengdar fréttir

Telur erfitt að skylda fólk í skimun á landamærum

Dómsmálaráðherra segir að erfitt geti reynst að skylda fólk til að fara í skimun fyrir kórónuveirunni á landamærum, horfa þurfi til annarra ráðstafanna þar. Sóttvarnalæknir segir að verið sé að skoða málið frá mörgum hliðum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.