Erlent

Kamala Harris nú með oddaatkvæðið í öldungadeildinni

Elín Margrét Böðvarsdóttir skrifar
Kamala Harris tók við embætti varaforseta Bandaríkjanna í dag, fyrst kvenna í sögunni. Það var eitt af hennar fyrstu embættisverkum að setja þrjá Demókrata í embætti öldungardeildarþingmanna. 
Kamala Harris tók við embætti varaforseta Bandaríkjanna í dag, fyrst kvenna í sögunni. Það var eitt af hennar fyrstu embættisverkum að setja þrjá Demókrata í embætti öldungardeildarþingmanna.  Getty/Drew Angerer

Hinn 33 ára gamli Jon Ossoff, varð í dag yngsti þingmaðurinn í öldungadeild Bandaríkjaþings en hann er jafnframt yngsti Demókratinn til að taka sæti í öldungadeildinni síðan Joe Biden varð öldungadeildarþingmaður árið 1973, þá 30 ára gamall.

Líkt og kunnugt er tók Joe Biden við embætti forseta Bandaríkjanna í dag, en það var eitt af fyrstu verkum nýs varaforseta í embætti, Kamölu Harris, að sverja Ossoff í embætti öldungardeildarþingmanns. Ossoff er nú ekki aðeins yngsti þingmaður öldungadeildarinnar, heldur einnig fyrsti Gyðingurinn til að verða öldungadeildarþingmaður fyrir Georgíu-ríki.

Kamala Harris sór einnig í embætti þá Raphael Warnock, sem einnig tekur sæti sem öldungadeildarþingmaður fyrir Georgíu, og Alex Padilla, sem tekur við sæti hennar sjálfrar sem öldungadeildarþingmaður fyrir Kaliforníu. Embættistaka þeirra er sömuleiðis söguleg en Warnock er fyrsti svarti öldungadeildarþingmaðurinn frá Georgíu auk þess sem Padilla er fyrsti öldungadeildarþingmaðurinn fyrir Kaliforníu sem er af suður-amerískum uppruna.

Nú eftir að öldungadeildarþingmennirnir þrír hafa svarið embættiseið skipta Demókratar og Repúblikanar með sér jafn mörgum sætum í öldungadeildinni, þar sem Repúblikanar höfðu áður meirihluta. Hvor flokkur á nú fimmtíu þingmenn í öldungadeildinni en sjálf hefur Harris oddaatkvæðið, Demókrötum í hag, þegar á reynir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×