Fanginn sem hafði mælt sér mót við dópsala var undir áhrifum fíkniefna

Fanginn á Litla-Hrauni, sem fluttur var á sjúkrahús á laugardag vegna meiðsla á hendi, reyndist undir áhrifum fíkniefna. Hann hafði mælt sér mót við fíkniefnasala á sjúkrahúsinu, en neysla vímuefna er algengt og viðvarandi vandamál í tukthúsinu að sögn fangelsismálastjóra.

Ekki er ljóst hvaða fíkniefna fanginn neytti, en ef miðað er við hegðun hans er talið líklegt að það hafi verið sýra. Hann hafði veitt sér áverka á hendi og fór fram á að hann yrði fluttur á sjúkrahús hið snarasta. Þegar á sjúkrahúsið var komið kom í ljós að umræddur fangi hafði mælt sér mót við fíkniefnasala. Hann hafði þó ekki erindi sem erfiði því fangaverðir komust á snoðir um fyrirætlanir fangans.

Grunur leikur á að gestkomandi hafi komið með fíkniefnin inn í fangelsið, en Páll Winkel fangelsismálastjóri segir fanga í neyslu leita ýmissa leiða til þess að verða sér úti um efnin.

„Það er því miður algengt að einstaklingar sem eru í mikilli neyslu leiti allra leiða til þess að verða sér úti um fíkniefni. Hvort sem það er á leiðinni í dómssal eða á spítala, og þetta vita fangaverðir og fylgjast með,” segir Páll í samtali við Vísi og bætir við að fíkniefnaneysla inni á Litla-Hrauni sé vandamál.

„Það hefur verið talsverð neysla þarna. Við höfum til dæmis tekið efni sem fest hafa verið á bifreiðar sem koma með matvöru. Þetta kemur inn með alls kyns munum til fanga og í rauninni bara eins og ímyndunaraflið býður upp á hverju sinni,” segir hann.

Páll segir mikilvægt að föngum sé boðið upp á alla þá þjónustu og meðferðarúrræði sem í boði séu fyrir fíkla. Þá séu agaviðurlög við slíkum brotum en þau hafa fyrst og fremst áhrif á framvindu fangelsisvistarinnar.

„Við höldum áfram að gera það sem við höfum gert, að leita á heimsóknargestum og leita í vörum sem koma inn í fangelsið og vera vakandi,” segir Páll Winkel.