Bestu og verstu jólagjafir fólks

Það á víst að vera hugurinn sem gildir þegar kemur að jólagjöfum til ástvina, en það verður að viðurkennast að það er alltaf ánægjulegt þegar gjöfin hittir beint í mark. Við fengum fjóra einstaklinga til að rifja upp bestu jólagagjafir sem þau hafa fengið, en líka þær verstu! Það er nefnilega ekkert sjálfgefið að fá gjöf sem vekur lukku.

Eiríkur Björn Björgvinsson, bæjarstjóri á Akureyri.

Besta jólagjöfin: „Líklega er fyrsta golfsettið sem við bræðurnir eignuðumst saman besta jólagjöfin. Hún kemur allavega fyrst upp í hugann.“



Versta jólagjöfin: „Ég hef bara fengið góðar gjafir. Allavega í minningunni. Mjúkir pakkar voru þó ekki í miklu uppáhaldi þegar ég var yngri og einhver föt sem ég fór aldrei í er líklega það versta sem ég hef fengið. En á seinni árum hafa mjúku pakkarnir komið sterkir inn.“



Sigga Lund, fjölmiðlakona.

Besta jólagjöfin: „Fyrsta gjöfin sem mér kemur í huga minn er gjöf sem ég fékk jólin 2013 þegar Alli, minn fyrrverandi, og Elí Þór, sonur minn, gáfu mér iPad í jólagjöf. Þetta var þegar við vorum að reka vefinn siggalund.is. Við Alli áttum engan pening og höfðum ákveðið að sleppa gjöfum hvort til annars þetta árið. Ég átti ekki von á neinu, en þeir komu mér svo á óvart. Það var ekki endilega iPadinn sem stóð upp úr heldur hugurinn sem var á bak við gjöfina sem snerti mig.“

Versta jólagjöfin: „Versta jólagjöfin er klárlega þegar fyrrverandi tengdapabbi gaf okkur þáverandi skötuhjúum lítinn byggpoka á fyrstu jólunum okkar. Ég get ekki annað en hlegið þegar ég rifja þetta upp. Pokinn var meira að segja rifinn svo það fór bygg út um allt þegar pakkinn var opnaður.“

Lóa Hjálmtýsdóttir, listakona.

Besta jólagjöfin: „Árleg hefð hjá Árna Rúnari er að gefa mér nýja myndasögu til að lesa yfir jólin. Þó svo að ég sé myndasögulesandinn á heimilinu tekst honum alltaf að finna eitthvað áhugavert sem ég hef ekki lesið. Ég hlakka alltaf mest til að opna þennan pakka.“

Versta jólagjöfin: „Ég man ekki hver það var en einhver í fjölskyldunni ákvað að nota tækifærið og skila framlengingarsnúrum sem viðkomandi hafði fengið lánaðar. Snúrunum var pakkað inn í jólapappír og viðtakandinn varð fyrir miklum vonbrigðum.“

Linda Jóhannsdóttir, hönnuður.

Besta jólagjöfin: „Bestu jólagjöf allra tíma fékk ég þegar ég var fimm ára. Rétt fyrir jól var ég með ömmu og afa að versla í Miklagarði, þar var óskabrunnur sem hægt var að setja pening í. Peningurinn rann til góðgerðarmála og þú fékkst ósk í staðinn. Afi gaf mér aur til að óska mér og ég horfði á peninginn rúlla niður og óskaði mér. Afi spyr hvers ég hafi óskað mér en ég neitaði að segja það þar sem óskin myndi þá ekki rætast en afi fullvissaði mig um að maður mætti segja einum. Á aðfangadag var svo rosalega stór jólapakki við hliðina á jólatrénu, ég man hversu heitt ég óskaði að það væri minn þar sem stórir pakkar voru bara betri á þeim tíma. Afi las á pakkann og hann var til mín! Ég opnaði hann og þetta var draumahús Barbie á tveimur hæðum með risasvölum og bleikri lyftu! Ég gleymi aldrei hversu ótrúlegt var að komast að því hversu mikill töframáttur væri í svona óskabrunni.“

Versta gjöfin: „Það verður því miður að skrifast á gjöf sem ég fékk frá kærastanum mínum fyrir svona tíu árum. Almennt eru gjafakaup ekki hans „thing“ en þetta árið var ég spennt að opna jólagjöfina frá honum eins og öll hin árin. Þegar ég fæ pakkann í hendurnar fer kærastinn að afsaka sig og segir: „Þú manst að ég hafði ekki mikinn tíma.“ Ég opna pakkann og í ljós koma bleikir köflóttir, loðnir akrýl-sokkar! Þeir voru ekki einungis köflóttir heldur líka með einhverjum brúnum myndum á. Sokkarnir voru með eins konar lambaáferð að innan en líka hálfloðnir að utan og það sem toppaði þá alveg var að þeir voru í stærð 34 og ég nota stærð 37.“