Fjárframlög til Sýrlands aukin

Alþingi samþykkti í gærkvöldi að hækka framlög til mannúðaraðstoðar í Sýrlandi á þessu ári um 50 milljónir króna. Það kemur til viðbótar við þær 23 milljónir króna sem veittar hafa verið aukalega til neyðaraðstoðar í landinu, að því er segir í tilkynningu frá utanríkisráðuneytinu.

Þá hefur verið ákveðið að ráðstafa 52 milljónum í byrjun næsta árs til mannúðaraðstoðar í Sýrlandi.

Framlög Íslands fara að stærstum hluta til Flóttamannastofnunar Sameinuðu þjóðanna, UNHCR, Barnahjálpar SÞ í Sýrlandi, UNICEF og til Sýrlandssjóðs Samræmingarskrifstofu aðgerða Sameinuðu þjóðanna í mannúðarmálum, OCHA, segir í tilkynningunni.

Sameinuðu þjóðirnar áætluðu í vikunni að 39 þúsund borgarar hafi flúið frá Austur-Aleppo, þar sem ástandið er einna verst. Sýrlensk stjórnvöld settu upp nýjar flóttamannabúðir til að veita fólki húsaskjól og þá hafa mannúðarstofnanir og borgarasamtök reynt að veita aðstoð.