Meistaradeildin lykillinn að ákvörðun Henry

Emmanuel Adebayor, félagi Thierry Henry hjá Arsenal, segist viss um að gengi liðsins í Meistaradeildinni á næstu vikum muni skera úr um það hvort Henry vilji verða áfram hjá félaginu eða fara eitthvað annað. Henry á enn eftir að framlengja samning sinn við Lundúnaliðið og um fátt annað hefur verið meira rætt á Englandi í vetur.

"Ég held að undanúrslitaleikirnir við Villareal geti gert útslagið með það hvort hann framlengir samning sinn eða ekki og þar fyrir utan verða þetta auðvitað gríðarlega mikilvægir leikir fyrir félagið," sagði Adebayor. Henry hefur þegar sagt að hann muni tilkynna ákvörðun sína áður en HM hefst þannn 9. júní í sumar, en hann heldur því fram að hann vilji helst vera áfram hjá Arsenal þó hann hafi verið orðaður við lið eins og Real Madrid og Barcelona á Spáni.