Sími til þín

Wayne Rooney, leikmaður Manchester United, fékk óblíðar móttökur frá stuðningsmönnum Liverpool þegar hann fagnaði marki sínu í leik liðanna á laugardaginn. Kappinn stríddi hörðustu stuðningsmönnum Liverpool í Kop-stúkunni svonefndu með því að hlaupa að þeim með ögrandi látbragði eftir að hafa skorað mark sitt. Þögn sló á áhorfendaskarann, sem hafði baulað grimmt á Rooney allan leikinn, en ekki vildi betur til en svo að einn hinna æstu áhorfenda kastaði farsíma sínum að leikmanninum. Lögreglurannsókn er hafin á atvikinu, en þótti sumum að Rooney hefði farið yfir strikið með fagnaðartilburðum sínum. Alex Ferguson, framkvæmdastjóri United, hefur þó komið stráknum til varnar og sagðist ekkert athugavert sjá við framkomu hans.