Blokhin ekki bjartsýnn

Oleg Blokhin, þjálfari Úkraínska landsliðsins í knattspyrnu, er ekki alltof bjartsýnn fyrir hönd sinna manna á HM, en aðeins 16 af þeim 23 leikmönnum sem að eru í landsliðshóp Úkraínu eru leikfærir. Margir lykilmanna Úkraínu hafa átt í meiðslum, þ.m. Andriy Shevchenko og Sergei Rebrov.

"Við höfum ennþá tíma til stefnu fyrir HM en eins og staðan er núna þá er ég ekki mjög bjartsýnn. Shevchenko og Rebrov eru enn að jafna sig eftir meiðsli og ég vona að við lendum ekki í frekari meiðslum fyrir HM," sagði Blokhin.

Blokhin hefur ekki ennþá ákveðið hver muni koma inn í hópinn í staðinn fyrir bakvörðinn Sergei Fedorov sem meiddist nýverið, en býst við því að hann muni kalla inn einhvern leikmann úr undir 21 árs landsliði Úkraínu.