Al-Sadr reynir að semja

Bráðabirgðastjórnin í Írak segir að sjíta klerkurinn Moqtada al-Sadr sé að semja um að fá að yfirgefa bænahús í borginni Najaf, óáreittur. Klerkurinn hefur haldið sig þar síðan Bandaríkjamenn hófu stórsókn inn í borgina í gær. Moqtada hefur gjarnan þennan háttinn á. Hann æsir til uppreisnar, hvetur liðsmenn sína til þess að berjast til síðasta blóðdropa og stingur sér svo sjálfur inn í eitthvert bænahúsið þegar í óefni er komið. Hann veit sem er að þangað fara Bandaríkjamenn ekki að sækja hann og hann hefur þá ráðrúm til þess að semja um nýtt vopnahlé.