Atvinnumaðurinn Gylfi er sjúkur í ferðalög og laxveiði

„Það er vissulega gaman að geta sinnt hlutverki fyrirmyndarinnar með þessum hætti. Sjálfur hefði ég sennilega viljað lesa þessa, en ég var duglegur að glugga í svona bækur þegar ég var krakki. Ekki til að lesa þær endilega, mest að skoða myndirnar,“ útskýrir Gylfi Þór Sigurðsson, einn fremsti knattspyrnukappi okkar Íslendinga.

Hann er efniviður nýrrar bókar sem ber titilinn Atvinnumaðurinn Gylfi Sigurðsson.

„Ég gæti svo alveg hugsað mér að skrifa eitthvað eftir ævintýrið á EM næsta sumar, eða eftir að ég legg skóna á hilluna, en læt þetta duga í bili,“ segir Gylfi og bætir við:

„Ég er mjög sáttur við að hún sé loksins komin út, en allt ferlið hefur tekið rúmlega ár. Það hefur verið gaman að gleyma sér í einhverju aðeins öðru en fótbolta, þetta eru náttúrulega gjörólíkir hlutir.“

Sú staðreynd kemur eflaust einhverjum á óvart, að Gylfi einskorðar sig ekki aðeins við boltaspark og titlar sig náttúrubarn, og kemur aðeins inn á þessar óvæntu hliðar í bókinni.

„Ég hef gaman af golfi, en svo hef ég gríðarlega gaman af að ferðast. Ég fór til að mynda til Suður-Afríku í safarí ekki alls fyrir löngu og það var sannkallaður toppur. Ég mæli með að allir skelli sér í svoleiðis, eitthvað aðeins annað en sólarlanda- eða verslunar­ferðir.“

Þá segist Gylfi njóta þess að renna fyrir lax.

„Það er nokkuð nýtt. En ætli ég sé ekki í grunninn bara náttúruunnandi,“ segir hann og skellir upp úr.

Gylfi segir bókina mikið til fjalla um sögu hans, frá uppeldisfélögunum til atvinnumennskunnar, og allt sem því fylgir.

Blaðamaður innir hann eftir hvort ekki sé himinn og haf milli þess að spila heima á Íslandi og hjá Swansea City í ensku úrvaldsdeildinni með sérstöku tilliti til fjölmiðlaágangs.

„Við Alexandra finnum ekki mikið fyrir frægðinni. Það er aðallega bara ef einhver sendir okkur linka á eitthvert efni af netinu,“ segir Gylfi sem er í sambúð með Alexöndru Helgu Ívarsdóttur.

„Við pælum ekki mikið í þessu. Ég myndi segja að áreitið sé því hóflegt.“

Gylfa er þegar farið að klæja í fingurna og segist gríðarspenntur fyrir áritun, sem fram fer 8. október í verslun 10/11 Ármúla.

Hann slær þannig tvær flugur í einu höggi, þar sem hann verður staddur á landinu vegna leiks landsliðsins gegn Lettlandi þann 10.október.  

Gylfi útilokar þó ekki að hann slái tvær flugur í einu höggi þegar hann kemur til landsins vegna leiks landsliðsins gegn Lettlandi á Laugardalsvelli þann 10. október næstkomandi.

Í framhaldinu spilar landsliðið sinn síðasta leik í undankeppni EM í Tyrklandi. Þá kemur í ljós hvort við Íslendingar höfnum í fyrsta eða öðru sæti riðilsins.